SAFF Cup nung India-i 2-1 agi Afghanistan kokogo

Thiruvananthapuram, January 03 (Agencies): Deobarnü India-i 2-1 agi taoba mapang takok ngua alir Afghanistan madak takok ngua South Asian Football Federation Cup tenetbenbuba benogo.
2013 küm iba asayamung Kathmandu nung asayadang India-i 0-2 agi Afghanistan madak tamakok ngua liasü.
2011 küm parnoki abenba marok tan Stephen Constantine-i aniba India team-i tanaben benogo. SAFF Cup nung India aser Afghanistan na tan agi tasemben buba final nung ajurutepba asayarba lir.
Afghanistan team-i mezüng minute 69 buba nung goal ka yoker aliba mapang India team nungi Jeje Lalpekhlua-i minute 72 buba nung goal ka yoka kasa aküm. Iba sülen mapang talila apuloktsür asayadang minute 101 buba nung Sunil Chhettri-i India atema goal ka yokba ajanga Greenfield Stadium nung asayaba final asaya nung India-i takok marok angu.
India (166 rank)-i parnok dang tajungba Afghanistan (150 rank) akokba ajanga Constantine India team atema coach kümer mezüng international asaya akoker asütsü.
Constantine India coach kümer külen India team-i 2018 World Cup qualifier asaya pongu tashi nung tamakok ngua lir ajisüaka tan takok marok anguba ajanga pa tasü aittsü akok.
SAFF Cup 11 ben asayaba nung tanü dena India-i 10 ben tashi final tongtetogo aser ibaji ajanga tan Brihostibarnü sangdongtsü aliba FIFA tarensen nunga jenjang tajungba akümtsü imlar.