SAG anogo 3 buba: India-i gold 53 densema, medal 79 agizükogo

Guwahati, February 08 (Agencies): Tang India North East kübok Guwahati aser Shillong na nung tasayadak 12 buba South Asian Games (SAG) anogo 3 buba nung, tanü Hombar nüa India nunger lasang kashishir, melangteper aser oset taret ajungketertemi medal jenti agizüka asayamong nung medal timba agizüker telok kümdaktsüogo.
Lasang toktepa kashishirtemi gold medal 5 tashi agizükba den külemi, melangtepertemia gold 5 agizüka tanü shilem agiogo.
Tanü tashi nung India teloki gold 53, silver 20 aser bronze 6 densema, ajak agi medal 79 tashi agizükba osang jangjaogo.
Sri Lanka telokia gold 11, silver 27 aser bronze 23 densema, ajak agi medal 61 tashi agizüka tang tanabuba jenjang nung lir.
Par telok ana sülen anidaka, Pakistan teloki gold 4, silver 11 aser bronze medal 14 densema ajak agi medal 29 agizüka tang tasembuba jenjang nung lir.
Shillong nung agiba tetsür compound tetoktepba nung Purvasha Shende, Jyoti Vennam aser Lily Chanu Paonam nungeri points 228-217 agi Bangladesh telok madak takok ngua India asoshi gold medal agizüktsü.
Purvasha-i maneni individual champion küma gold 1 agizükba den külemi, tebur individual silver medallist, Abhishek den külemi lungjemer mixed pair tetoktepba nunga gold agizüka liasü.
Tebur World No. 5, Rajat Chauhan-i points 144-142 ngua külem sensopur, Verma madak takok ngua tebur individual champion akümba sülen paia India asoshi gold 1 agizüktsü.
Tenati külemi lungjemer team tetoktepba nunga gold agizüka liasü.
Guwahati nung agiba melangteptsü tetoktepba tatembangba anogo nung India nunger melangtepertemi tanü gold 5 aser silver 1 agizükba sülen tan asayamong nung ajak agi melangteptsü shilem indang gold 14 aser silver 2 agizüker telok aküm.
India’er tetsür melangtepertemia ajak agi gold medal 8 tashi agizükba osang jangjaogo.
Shilpi Sheoran-i tetsür temang touzük seret 63 taret gold agizükba den külemi, Rajani o Nikki natia tetsür temang touzük seret 69 aser 75 taret shilem indang gold agizük.
Tebur shilem nung Mausam Khatri o Pardeep nati temang touzük seret 97 aser 74 taret shilem indang gold agizükba sülen Mandeep-i seret 125 taret shilem nung silver agizük.
Oset taret ajungketer weightlifters-temia tanü gold 4 prongla agizüka liasü.
Victor Abilash Christopher, Pardeep aser Vikas Thakur nungeri tebur temang touzük seret 105, 94 aser 85 taret shilem nung gold aser Kavita Devi-i tetsür seret 75 taret shilem indang gold agizük.
Tanü gold agizükbaji densema, India teloki ajak agi weighligting gold 11 agizüka lir.
Cycle toktepa anishirtemia tanü gold 2 agizükba sülen tanü tashi nung ajak agi gold 5, silver 3 aser bronze 1 agizükba osang jangjaogo.
Tetsür 40km team time trial tetoktepba final nung T Bidyaluxmi, Rutuja Satpute, G Manisha aser Chaoba Devi nungeri mapang 59:23.5secs nung alizüng mezüng tonga gold agizük.
Tebur 70km team time trial final nunga Arvind Panwar, Manjeet Singh, Deepak Kumar Rahi aser Manohar Lal Bishnoi nungeri ghonda 1, minute 29 ser seconds 37.840 nung alizüng mezüng tonga gold agizüka liasü.