SAG: India-i medal 248 agizük; Kavita-i Olympics nung shilem agitsü jenjang angu

Guwahati, February 12 (Agencies): Tang tasayadak 12 buba South Asian Games (SAG) asyamong nung India teloki gold 146, silver 79 aser bronze 23 densema, ajak agi medal 248 tashi agizüka tanü, Hokolbar nüa medal timba agizükba telok kümogo.
India’er long-distance asemer, Kavita Raut-ia taküm 2016 küm asayatsü ayongba Rio Olympics nung shilem agitsü jenjang ngua tanü kangasa junga shilem agiba osang jangjaogo.
India sülen anidaka, Sri Lanka teloki gold 25, silver 53 aser bronze 79 densema, ajak agi medal 157 aser Pakistan teloki gold 7, silver 23 aser bronze 43 densema, ajak agi medal 73 agizüka overall shilem nung tanabuba aser tasembuba jenjang ngua lir.
Tanü athletics tetoktepba tatembangba anogo nung arishi küm 30 tain Kavita-i ghonda 2, minute 38 ser second 38 nung alizüng mezüng tonga gold medal agizükba den külemi, lai Rio Olympics nunga shilem agitsü jenjang ngua liasü.
Rio Olympics tetsür marathon nung shilem agitsü temsüa akümtsü asoshi asayar kati mapang 2:42:00 nung alizüng atongtsü latetja lir aser Kavita-i iba mapang tekübok nung alizüng atongba yong lai Olympics nung shilem agitsü jenjang tajungji tanü angu.
Kavita jakdang, O P Jaisha, Lalita Babbar aser Sudha Singh nungeria Rio Olympics tetsür marathon tetoktepba nung shilem agitsü jenjang ngua lir.
Olympics nung shilem agitsü jenjang ngua alisang, Nitender Singh Rawat-ia tebur marathon gold aser Kheta Ram-i bronze agizükba densema, India teloki athletics shilem nung gold 28, silver 22 aser bronze 9 agizükba osang jangjaogo.
Prangpong toktepa kashitsütsü shilem nunga Chain Singh-i tebur 50m rifle prone gold aser Chain, Gagan Narang aser Imran Khan nungeri tebur telok shilem nunga gold agizüka liasü.
Tebur individual 20m standard pistol tetoktepba nunga Neeraj Kumar, Gurpreet Singh aser Mahender Singh nungeri India asoshi gold, silver aser bronze agizükba den külemi, par asemi aroki lungjemer team gold-a agizüktsü.
Ano külen, tetsür hockey final nung India tsürtemi goal 10-0 agi Sri Lanka tsür madak ajemshia koka gold agizükba osang jangjaogo.