SAG: India’er prangpong kashishirtemi gold 6 agizük

India’er tetsür prangpong toktepa kashishirtem, Anjum Moudgil (Tiyongtsü), Elizabeth Susan Koshy (Abelen) aser Lajja Goswami nungeri 12 buba SAG asayamong tetsür 50m rifle 3 positions indang gold, silver aser bronze medal amer agiba noksa ka yangi angur. (Guwahati, February 13)

Guwahati, February 13 (Agencies): India’er prangpong toktepa kashishirtemi gold medal 6 tashi agizüka tang tasayadak 12 buba South Asian Games asayamong nung tanü, Honibar nü shilem agiogo.
Omkar Singh-i tebur 10m air pistol, Rahi Sarnobat-i tetsür 25m air pistol aser Anjum Moudgil-i tetsür 50m rifle 3 position tetoktepba nung India asoshi gold agizüktsü.
Tanü gold 6-ji agizükba densema, India teloki prangpong kashitsütsü tetoktepba anogo 4 nung gold 18, silver 8 aser bronze 8 densema, ajak agi medal 34 agizükogo.
Tanüngba anogo 2 nunga India teloki maneni takok ngua medal agizüktsü teimla yua lir.
Tebur 10m air pistol tetoktepba nung Omkar sülen anidaka, külem sensopur, Gurpreet Singh aser Jitendra Vibhute nati silver aser bronze agizük.
Par asemi aroki lungjemer tebur 10m air pistol shilem nunga team gold agizüka liasü.
Tetsür 25m pistol final asaya nunga Sarnobat sülen anidaka, külem sensotsür, Anisa Sayyed-ia bronze medal agizük.
Sarnobat, Anisa aser Annuraj Singh nungeri maneni tetsür team gold-a India asoshi agizüka liasü.
Tetsür 50m rifle 3 positions nunga Moudgil sülen anidaka, külem sensotsür, Elizabeth Susan Koshy aser Lajja Gauswami nati silver aser bronze medal agizük.
Par asemi aroki lungjemer telok shilem nung gold-a agizükba osang jangjaogo.
Tanü prangpong toktepa kashishirtemi takok tulu ngua aka, India’er hockey telokibo tebur hockey final nung yashi, Hokolbar nü tamakok ajuruba osang jangjaogo.
Awaisur Rehman-i takokba goal agütsüba sülen par Pakistan teloki goal 1-0 agi India madak takok ngua gold medal agizük.
2006 aser 2010 na final asaya nunga Pakistan teloki India telok tsükdakja gold medal agizüka liasü.