SAG mera keta tembangogo; India-i temaba jenjang angu

Assam kübok Guwahati yimti nung agiba 12 buba South Asian Games 2016 asayamong shibangba sentong nung India Sports Minister, Sarbananda Sonowal-i o jembiba noksa nung angur. (Guwahati, February 16)

Guwahati, February 16 (Agencies): India Northeast kübok Guwahati aser Shillong na nung anogo 12 tashi asaya balala toktepa asayaba sülen Union Sports Minister & Minister of State, Youth Affairs & Sports (Independent Charge), Sarbananda Sonowal-i 12 buba South Asian Games (SAG) Guwahati kübok Indira Gandhi Athletics Stadium nung tan Mongolbar aonung shibangtsüogo.
“Ni 12 buba SAG asayamong shibangtsür,” ta shia, Sonowal-i South Asian Association for Regional Cooperation (SAARC) nung züngsemba linük 8 nungi asayar 2500 shi shilem agiba asayamongji shibangtsü.
Tan asayamong shibangba sentong nung Assam Chief Minister, Tarun Gogoi, Meghalaya Sports Minister, Zenith M Sangma aser Indian Olympic Association (IOA) lenirtemi shilem agia liasü.
Asayamong milen remseptsüba sülen Sonowal-i South Asian Olympic Council (SAOC) wako SAOC Tir, N Ramachandran nem amoktsü aser Ramachandran-i kasaji 13 buba SAG Organising Committee Chairman & Nepal Olympic Committee lenisang, Jeevan Ram Shreshtha ket tongtsü.
Taruba SAG asayamong Nepal nung asayatsü renema lir.
12 buba SAG asayamong nung India teloki gold 188, silver 90 aser bronze 30 densema, ajak agi medal 308 agizüka temaba jenjang angu.
India sülen anidaka, Sri Lanka teloki gold 25, silver 63 aser bronze 98 densema, ajak agi medal 186 agizüka tanabuba aser Pakistan teloki gold 12, silver 37 aser bronze 57 densema, ajak agi medal 106 agizüka tasembuba jenjang angu.
Tanü asayamong tatembangba anogo nung India’er tetsür tsüngtepertemi gold medal 3 aser judokas-temia gold 2 aser silver 2 agizüka India nem takok tulu bener arutsü.
London Olympics bronze medallist, M C Mary Kom-i tetsür temang touzük seret 51 taret, L. Sarita Devi-i seret 60 taret aser Pooja Rani-i seret 75 taret final koka India asoshi gold 3 agizüktsü.
Judo tetoktepba nunga Avatar Singh-i tebur temang touzük seret 90 taret ser tekübok aser Pooja-i tetsür seret 70 taret ser tekübok final nung takok ngua India asoshi gold 2 agizüka liasü.
Aruna-i tetsür temang touzük seret 78 taret ser tekübok aser Shubham Kumar-i seret 100 taret ser tekübok final nung tamakok ajuru saka tenatia India asoshi silver medal kaka agizüktsü.

12th South Asian Games-2016 MEDAL TALLY
Country Gold Silver Bronze Total
INDIA 188 90 30 308
SRI LANKA 25 63 98 186
PAKISTAN 12 37 57 106
AFGHANISTAN 7 9 19 35
BANGLADESH 4 15 56 75
NEPAL 3 23 34 60
MALDIVES 0 2 1 3
BHUTAN 0 1 15 16