SAG milen bener NE ajak asemtsü

Kohima, Jan. 28 (TYO) : North East India nung mezüngbuba otsü asütsüsa taruba ita February 5 nungi 16 tashi 12 buba South Asian Games (SAG) asayamong sentong Guwahati aser Shillong na nung asayatsü ayongzüka lir.
Iba asayamong (SAG) milen bener North East nung state yimtiba ajak ajanga asemtsü asoshi Ministry of Youth Affairs & Sports, Government of India-i metetdaktsüogo.
Anungji, iba milen bener asemba sentong ya Kohima nunga February 1, 2016 nü agitsü renema lir. SAG milen yagi Kohima January 31, 2016 anogo nung atongtsü. Kohima nung agitsüba sentong ya Youth Resources & Sports, (YRS) department ajanga anepalutsü aser SAG milenji bener February ka anepdang 6:30 ako nung T.T. Indoor Stadium nungi Khuochiezie (Local ground) Kohima tashi asemtsü. Iba sentong nung Nagaland nung asayar nüngtugutem den kaketshirtemi shilem agitsü. Parnok den ano NSS volunteers, NCC Cadets, Bharat Scouts & Guides, NYKs, Indira Gandhi Stadium Academy aser sorkar ketdangsertemia shilem agitsü.
Iba sentong nung Nagaland Olympic Association kübok dena aliba Sports Association ajak nungi lenirtemi shilem agidaktsüner ta sentong anepalurtemi mepishia metetdaktsüogo.