Sahibabad nung mi lendong ajanga nisung 13 tashi asü

Ghaziabad, November 11 (Agencies): Hokolbarnü Sahibabad nung aliba süoshi factory ka nung mi lendong tulu adoka nisung 13 rongsetogo.
Iba miji Ghaziabad, Sahidabad kübok Shaheed Nagar kiyong nung aliba factor nung short circuit ajanga atalok.
Police-i ashiba agi, ajungbena mi tulu adokba ajanga temeket ajunga sangwatsü; Iba mapang nung factor telung nungji tajemba agi nisung 40 liasü.
Mi lendong atalokba sülen mapa inyakertemi ajentsü merang, saka lenmang kanga temesü asübayong nisung 20 bo jena madokteti liasü.
Parnok nisung 20 rongnung nisung 13 mi jagi rongset aser nisung asembo tesüsa jena oteta anasa aliba mozükidangi anir ao.
Iba factory kibur jagi factory ji nisung asem nem lease nung agüja liasü.
Fire Station Officer, Abul Abbas Hussain-i ashiba agi, mi lendongji tanep 5:20 ako meta atalokba sülen fire brigade sepaitem iba tesemji tonga ao.
“Timtemji, factory-i aoba lenmang kanga temesü asüba ajanga liasü. Onoki mi ensepba garitemji tonga anir mouteti liasü. Ajisüaka ghonda ana sülen tesüsa onoki miji ensep,” ta ketdangser Hussain-i metetdaktsü.