Sahitya Akademi-i kaketkeno zülurtem pusema nungiter

New Delhi, October 23 (Agencies): India nung kaketkeno tentet Sahitya Akademi-i Hokolbarnü Kannada nunger kaketzülur MM Kalburgi tepsetba aitsüogo.
Parnokisa Sahitya Akademi sempet angurtem dang parnoki sempet meyipa agütsüba tanaben agiang, ta mepishia metetdaktsü.
Hokolbarnü Sahitya Akademi rongdak senden ka ayongzüka agiba sülen iba temepishiba agütsü. Linük nung tensa mejungi akümba aser iba onük atema Sahitya Akademi-i ola madokba atema kaketzülurtemi mepelaba osang prokshiba sülen tanü parnok senden ayonga agi.
“Executive Board-i Professor Kalburgi aser tanga kaketzülurtem tepsetba kukua aitsür” ta Sahitya Akademi President, Vishwanath Prasad Tiwari-i metetdaktsü.
“Akademi-i India nung oshi ajak nung ‘Right to Freedom of Expression’ pusema nungiter aser linük tesem mashi ka nung kaketzülur dak teka sangshiba inyakyim kukua aitsür” ta paisa ashi.
Centre aser state sorkartemi lokti nung yimjung alitsü atema inyaktsüla ta Akademi-isa takhangba agütsü.
Iba senden malidang New Delhi nung kaketzülurtem aser parnok pusemertemi lungkak aita jajaba sentong ka agi.
Oshi balala nungi kaketkeno zülurtemi Sri Ram Centre, Safdar Hashmi Marg nungi Sahitya Akademi building tashi ola madoki lungkak aita jaja aser Akademi nem tezüluba ka nung takhangba agütsü.
Taoba hopta tsüngda India nung Sahitya Akademi sempet angur kaketzülur 40 den timbai pei anguba sempet meyipa agütsüogo aser Akademi nung mapa inyakba menden toktsü.
Hopta ishika linük nung nashi shi achiba atema nisung tepsetba, columnist Sudheendra Kulkarni aser Jammu & Kashmir nungi MLS ka dak shisa shilokja mezüngmeshiba maparen atalokogo. Ano küm ka tsüngda Kalburgi densema tensa den apet zülur aser jembirtem nisung asem tashi tepsetogo.