Sahitya senden metenzükdang kaketzülurtem lungkak ait

New Delhi, Ocotber 23, 2015: New Delhi nung Hokolbar nü Sahitya Akademi kima India nunger sangro zülur aser kaketzülurtemi o zülu balala amer lungkak aitba noksa nung angur.

New Delhi, October 23, (Agencies): Tanü Delhi nung Sathitya senden metenzükdang Sahitya Akademi awards meyipa agütsür kaketzülurtem lenmang nung lungkak aita liasü, ta osang ka ajanga ashi.

Iba senden nung Akademi nung densema alir kaketzülur aser sangro zülurtemi Academi award meyipa agütsüba indang onük jembitsü liasü.

Ato kilonser Narendra Modi’er sorkar kübok linük nung tamangba lokti tsüngda mepetmesü aser tesempatep adokba den külemi kaketzülurtem sadoka melitettsüsa inyakba anema kaketzülurtem aikati Akademi awards meyipa agütsüogo aser aikati iba tentet nung pei menden aser züngsem toktsüogo.

Kannada nunger shisashir aser kaketzülur, MM Kalburgi tepsetba aser tawa Uttar Pradesh, Dadri nung Muslim nunger ka tepsetba ama tatalokbatem nung ajemdaker kaketzülur aikati parnoki award meyipa agütsütsü telemtetba agi, ta shiogo.

Academi senden amenba sülen kaketzülurtemi akhangba ama meinyaktsüra ano maneni parnoki lungkak aittsüa akok ta aikati bilemer.

“Kaketzülurtem tepsetba ama tata tatalokbatem nung ajemdaker parnoki temelung rakpoka jembiba ajanga Akademi tashi miti kümogo. Academi-i kechi telemtetba agitsü’ar ibaji jilia jembitsüji majung, ajisüaka parnoki parnok noktaka aliba nungi matsüngshitsü ta ni amanger,” ta kaketzülur Vikram Seth-i ashi.

1998 küm arishi küm 63 Seth-i The Golden Gate kaket ajanga Akademi award ngua liasü.