SAI, Dimapur-i U-17 FIFA World Cup atema asayar bushir

Dimapur, September 21 (TYO): Dimapur nung Sports Academy of India (SAI) kübok tentetba Sports Training Centre-i Mokokchung, Kohima aser Dimapur nunger nung football asayatsü sempet akartem bushitsü sentong ayonga agitsü renemogo.
2017 küm India nung asayatsü ayongba U-17 FIFA World Cup asayamong nung shilem agidaktsütsü nükjidong nung SAI aser All India Football Federation (AIFF) nati külemi lungjemer India ajunga nung football asayar tajungtem bushiba maparen den sentaktepa, SAI Dimapur-ia iba sentong ya ayongba osang ka Naba Singh, Centre Incharge, SAI Dimapur-i metetdaktsü.
Tan ayongba tetendangba sentong nung shimtetba asayartemji SAI, NECR Imphal nung maneni anogo 20 agia tendangshitsü aser iba sentong ya taruba October ita tatembanglen agitsü renema lir.
Asayar shimba sentongji Mokokchung nung tan September ita 28 anepdang 7:30 ako nungi tenzüka Imkongmeren Sports Complex nung agitsü renemogo.
Ano, Kohima nunga D-Khel Kohima Village nung taruba October 2 anepdang 7:30 ako nungi tenzüka aser Dimapur nung taruba October 6 anepdang 7:30 ako nungi tenzüka iba sentong ya GHSS/ SAI Ground nung agitsü renema lir.
2000 küm January ita 1 nü aser tesülen asor asayartemi iba tetendangba sentong nung shilem agittettsü.
Asayar shimba sentong nung shilem agirtemi MCD/Sorkari agütsüba tasoba kulikaket den passport noksa 3 bener pei alidak agitsü ayongba tesemtemi asaya sübotsü peria sübor mapang shitak nung atongtsü metetdaktsüogo.

You must be logged in to post a comment Login