Saibaba Temple dangi sen crore 6.66 tenla aru

Shirdi (Maharashtra), Chiteni (July) 31 (Agencies): Shirdi nung aliba Saibaba temple nung anogo asemnü ‘Guru Poornima’ festival amungdang sen crore 6.6 shi tenla aru ta ketdangpur kati ashi.
Chiteni (July) 26 aser 28 tashi benjung amungdang tekülemertemi sen crore 3.83 tenla agütsü, ta Shri Saibaba Sansthan Trust indang Chief Executive Officer (CEO) Rubal Agrawal-i ashi.
Tekülem ki telung nung ayuba donation counters nung sen aruba den külemi kimalen ayubatem nunga sen crore 1.57 aru, ta laisa ashi.
Iba dakji alia online donations, debit cards, cheques aser demand drafts ajanga sen crore 1 aru, ta CEO Rubal-isa shisem.
USA, London, Malaysia, Canada, New Zealand aser Gulf linüktem nung aliba tekülemertemi sen lakh 11.25 shi alang foreign currency tenla agütsü. Anogo asemnü benjung nung tekülemertemisa sen lakh 13.53 alangba hon aser tariba osettem tenla agütsü, ta laisa metetdaktsü.
Tenla aruba dak alia temple trust-i semdanger nem pass agütsüba, ‘laddoos’ aser chiyungtsü agütsüba nung sen crore 2.7 aazük, ta Agrawal-isa ashi.
Tekülem ki ket nung jon seret 422 aser tariba seret 4,800 shi lir. Nationalised bank balala nung tekülem ki indang fixed deposits sen crore 2,180 shi yua lir, ta laisa metetdaktsü.
Guru Poornima festival mapang linük aser bendanglen nungi tekülemer lakh 3 dak tema Saibaba temple semdang, ta CEO-isa shisem.