Saif Ali Khan indang ‘Baazaar’ film Mongputeni 26 nü sayatsü

Rongjui/September 14 (Agencies): Taoba küm ishika tsüngda Bollywood actor Saif Ali Khan-i film industry nung shilem tajung agia aruba asenoki jangjaa lir. ‘Chef aser Kaalakaandi’ amala film nung Saif-i tongti shilem agia takok tulu anguba osangtem angazükogo.
Tang Netflix series, Sacred Games nunga Saif-i shilem agia takok tajung ngua arudar. Saif sapurtem atema osang tajung kaji pa indang taruba film ‘Bazaar’ sayatsü asoshi anogo tejangja ka agütsübaji asütsü.
Taoba mapang Director Gaurav K. Chawla lenisüba kübok yangluba film ‘Baazaar’ sayatsü asoshi anogo atsülanga aser melenshia aruba osangtem aika dang angazükogo. Ajisüaka, tang Saif Ali Khan-i tongti shilem agiba thriller film ‘Bazaar’ ya taküm küm Mongputeni/October 26 nü sayatsü atema film yanglurtemi osang jangjashitsüogo.
Sacred Games series nung Saif den külemi shilem agila star, Radhika Apte den pai longjema shilem agiba angutsü. Bazaar film nung tena külemi longjema shilem agiba angazüka theatre nunga fans tem aika atsüa arutsü teimla lir. Iba den külemi Baazaar film Saif o Radhika na den külemi actor Vinod Mehra’er jabaso Rohan Mehra-i mezüngbuba shilem agiba angutsü.
Nikkhil Advani aser Ajay Kapoor na longjema Baazaar film produce süogo. Temalen, twitter ajanga Nikhil-i aruya aliba film indang poster ka lemsatep aser poster nungji, “Yahan paisa bhagwaan nahin, par bhagwaan se Kam bhi nahin.” (Here, money may not be God, but is also no less than God.) ta olen zülutsür liasü.
Baazaar film otsü ya Advani, Parveez Sheikh aser Aseem Arora nungeri zülütsüogo. Iba film ya Viacom18 Motion Pictures aser KYTA Production na lonjema present asütsü.
Tang tashi nung film yanglurtemi ‘Bazaar’Mongputeni/October 26 nü saytsü lemtetbaji anogo tetemjen ka asütsü, saka kasa anogo nung tanga film tem sayatsü atema sangdongtsü akok koba tokteptsü atema maongka tajung ka asütsü.