Saif Ali Khan ‘Supercars Megabuild’ nung tongti asütsü

New Delhi, August 29, 2016 : Actor Saif Ali Khan National Geographic channel indang “Supercars Megabuild” sentong nung tongti asütsü. Iba sentong ya tereprangertem atema jangratemtsüka asütsü, ta pai ashi.
Iba sentong nung nüngtugu aser senkhu tulu indang gari kar aseni nüngdakba ama tajungba küma yanglushiba angutsü. Iba sentong ya gari meimertem atema jangratemtsü aser nüngdak asütsü.
“Ni tetsüng pezü aketba gari tajung aser engine tashi taittem kanga jangrar aser ibaji iba sentong nung angutsü. Iba sentong nung jangratemtsüji, mongin designer aser technician tem senteper gari tajungtem agi ano tajungba küma melenshia khenyongi balaka yangluteta supercar kümdaktsüba angubaji asütsü. Iba sentong ajanga tereprangertema jangradaktsütsü ama ni kanga temulung lema bilemer,” ta Saif-i sangdong ka ajanga metetdaktsü.
“Supercars” sentong ya automotive designer Afzal Kahn-i ketdang asütsü. Episode shia nung Kahn aser par teloki mission tasen kaka ajanga gari tajung agi supercar küma yangluba sayutsü.
“Iba sentong nung taküm atema tongtibang nisung ka shimtsü bilemdangdang Saif Ali Khan alema tajungba shinga maliasü. Pai kuxury garitem aser machine tajungtem den item oset indang science & technology kangasa sapur, anungji iba sentong atema pa tetemsü lir. Pa adenba ajanga onok kanga pelar,” ta India FOX Networks Group nung Business tekolakba Swati Mohan-i ashi.
“Supercars Megabuild” sentong ya September 26, 2016 nü nungi sayutsü.