Saif’er jala Sara ‘Student of The Year 2’ nung shilem agitsü

New Delhi, February 18 (Agencies): Bollywood nung olulu kanga kara prokshir. Tang olulu kanga sashia jembibaji Saif Ali Khan’er jala Sara Ali Khan Karan Johar-i yangluba film ‘Student Of The Year 2’ film nung shilem agitsü. Iba ya la asoshi mezüng film asütsü.
Sara-i iba film nung Disha Patani melena shilem agitsü. Osang ka ajanga ashiba agi, “Iba film nung Disha shilem agitsü asoshi renemer liasü, aser Tiger-ia la den act asütsü asoshi molunga liasü. Tena film nung külemi shilem agiasübo tereprangertem atema kanga jangratemtsü ka süla.
Producer Karan Johar aser director Punit napronglai Disha film nung shilem agidaktsütsü asoshi molunga liasü, kechiyong la yimya kanga tanep aser film nung kanga tasüitta shilem agir.
La MS Dhoni: The Untold Story aser Jackie Chan den Kung Fu Yoga nung shilem tajung agi, saka mejangjaba kuli kar ajanga lai Sara nem iba shilem agutsü.
Iba ya maneni film industry nung nüngtugu actor tem chir tangar dang nungi tali sapua shimba kuli ka lir.
KJo-i Sara ‘The Fault In Our Stars’ yanglushiba nung Shahid Kapoor tenu Ishaan Khattar den külemi shilem agidaktsütsü renemer liasü, saka iba sentong mataloki.
Karan-i iba film atema kanga meimshir, aser pai dang film osangtem sangdongner. Maneni parnok Disha film nung shilem magütsüba temai adokba atema mepelai bilemer.”