Saina aser Verma nati anir Korea Open asayatsü

Rongjui/September 24, 2018 (Agencies): Sangtennü nungi asayatsü aliba USD 600,000 Korea Open World Tour Super 500 tournament nung Saina Nehwal aser Sameer Verma nati anir India nunger badminton asayartemi shilem agitsü.
Saina shiba iba ita tetenzük len asayaba Japan Open nung shilem magi, la iba asayamung nung Korea tsür Kim Hyo Min den mezüngbuba round nung asayatsü.
Jenjan 10buba nung alila Sainai-i taküm tongtibang asayamungtem nung shilem tajung agia lai Gold Coast Commonwealth Games nung gold medal tanabuba aser Jakarta Asian Games nung bronze medal koktetogo, saka la BWF asayamungtem nung junga masayateti arudar.
Aenjeti/Jan Indonesia Masters nung Saina-i final tonga asayaogo saka la Korea tsür Sung Ji Hyun-i taoba hopta China Open mezüngbuba round nung tsükdaktsü. La iba asayamung nunga kanga ayongabo masayatsü aser quarterfinals nung Japan tsür Nozomi Okuhara den asayatsü akok.
Tebur kija asaya nung Kidambi Srikanth iba asayamung nung shilem magitsü lemtetba sülen Sameer Verma-i anir India nunger asayartem asayatsü.
Sameer yiruba ajanga kangshia arur temang tajungba akümba sülen Tsüklai/Feb nung Swiss Open aser iba ita tetenzüklen Hyderabad Open kokogo.
Kasa mapang nung arishi küm 23 tain Dhar shiba 2016 Hong Kong Open nung runners-up liasü, pa Denmark nunger Anders Antonsen den mezüng asayatsü.
Pai Denmark nunger asayar ya taküm Aenjeti/Jan nung India Open nung kokogo. Dar mezüngbuba round ajangtetra pa world champion Kento Momota den asayatsü imlar.
Maneni tetsür kija asayar Vaishnavi Reddy Jakka-a iba asayamung nung shilem agitsü. La USA tsür Beiwen Zhang den mezüng asayatsü.
Tanga asayartem rongnung Ajay Jayaram qualifier nung China nunger Zhao Junpeng den asayatsü. Vaidehi Choudhari aser Mugdha Agrey nata tetsür kija asaya qualifying round nung asayatsü.