Saina, Ashwini-Satwik Quarters-i iogo

Nanjing, Luroi/August 2 (Agencies): World Championship tanü asaya nung London Olympics bronze medallist Saina Nehwal-i tetsür kija asaya nung Thailand tsür Ratchanok Inthanon koka quarterfinals-i iogo.
Kasa mapang nung tarep temeyoktep asayar Satwiksairaj Rankireddy aser Ashwini Ponnappa nati world no.7 Malaysia nunger tarep Goh Soon Huat aser Shevon Jemie Lai na koka medal angutsü asoshi jenjang ka dang ajangtsü anunga lir.
Saina shibai 2015 aser 2017 küm iba asayamung nung silver aser bronze medal kokteta lir lai 2013 champion Inthanon 21-16 21-19 agi straight set nung koka taruba round nung Spain tsür Carolina Marin den asayatsü asoshi maongka ngutetogo.
“Iba takok ya kü asoshi kanga tontibang asü. Lai tasa tajung amshia la den asayar ashioktsüba ajanga ajaki la meteta lir. Tanabuba game nung ni kangajunga asayaa liasü saka ajungbena lai kanga junga asaya tenzük, lai court ajak ayimjema asaya aser point 19-19 aküm. Iba mapang nung kü coach Gopi-i shilem tulu agi. Pai kü dang koma asayatsü aji ashi aser ni pai ashiba angaa asaya, iba sülen ni asaya akok,” ta Saina-i asaya temer ashi.
Taruba asaya indangjembidang Saina-i ashiba agi, “Ni la den tatembangsa Denmark Open nung asayaogo, la kanga dang tekera aser aggressive asayar ka lir anungji taruba asaya ya kü asoshi kanga melarabo masütsü, saka ni kü tajungtiba agi asayatsü merangtsü.”
Kasa mapang nung Satwiksairaj aser Ashwini nati kangajunga asayaa Commonwealth Games nung India nunger atema tarep temeyoktep asaya nung mezüngbuba gold medal koktetogo. Tenati tanü asaya nung Goh aser Shevon na 20-22 21-14 21-6 agi kokogo.
“Künati mezüngbuba game nung aibelen aika mena, saka tanabuba game nung küna indang strategy yanglur aitba tali tajungba angateta asaya. Künati asaya nung rangloker asayateta asaya akokba atema kanga pelar,” ta Ashwini-i osangbenertem dang ashi.
Tena taruba asaya No. 1 aser top-seeded China nunger tarep Zheng Siwei aser Huang Yaqiong na den asayatsü.