Saina-i bronze medal ngutetogo

Glasgow, August 26 (Agencies): World Badminton Championships asaya nung India tsür Saina Nehwal semifinal nung tsüka bronze medal dang ngutetogo. Tetsür semifinal asaya nung Rio Olympics bronze medallist Japan tsür Nozomi Okuhara-i Saina tsükdaktsü.
Saina-i küm ana tejakdang Jakarta nung iba asayamung asaya dang silver medal nguteta lir. Semifinal asaya nung lai akok tashi meranga asayaogo saka Okuhara-ia metoktsüi kanga meranga asayaa iba asaya akok.
Iba asaya ghonda kaser minute 14 asayaa liasü. World No. 12 Japan tsürla yagi Saina madak 12-21, 21-17, 21-10 agi takok ngua la lar linük nungi World Championship final mezüng tongtetla kümogo.
Joko India nunger atema iba asayamung nung Olympic silver medallist PV Sindhu kicha dak dang timla lir. La semi-final nung China tsür Chen Yufei den asayatsüba lir.
Tang tashi nung Saina aser Okuhara na tenetben tashi asayaogo aser Saina-i trok ben koka lir.
Kasa mapang nung Viktor Axelsen, Denmark nunger rongnungi küm 16buba nung Badminton World Championships tebur kicha asaya nung mezüngbuba final tongtetsang kümogo. Pai defending champion, Chen Long 21-9, 21-10 agi minute 39buba nung akok.
Pa Lin Dan aser Son Wan Ho na semifinal asayaba sülen takoker den asayatsü.