Saina-i Rio Olympics nung shilem agitsü jenjang angur

Rio de Janeiro, May 06 (Agencies): India’er tetsür badminton asayar mongin, Saina Nehwal-i Brazil kübok Rio de Janeiro nung taküm August ita asayatsü ayongba Rio Olympics asayamong nung shilem agitsü jenjang tanü, Hokolbar nü nguogo.
Saina den külemi, tetsür doubles asayar, Jwala Gutta densema, India’er badminton asayar 7 tashi Rio Olympics nung shilem agitsü temeten anguba osang jangjaogo.
Yaküm, 2015 küm May ita 4 nü nungi tenzüka taküm May ita 1 nü tashi nung badminton asaya shilem 5 –  tebur singles, tetsür singles, tebur doubles, tetsür doubles aser mixed doubles tarensen nung jenjang tajung angurtem indang tarensen, BWF world rankings tanü adoktsüba sülen India’er badminton asayartemi Rio Olympics nung shilem agitsü temeten anguba osangji jangja aküm.
Saina-i taküm agi India tenüng nung Olympics nung tasembenbuba toktepa shilem agitsü aser Jwala o Ashwini Ponnappa nati taküm agi tanabuba Olympics nung India tenüng nung shilem agitsü jenjang angur lir.
Ano, K Srikanth aser PV Sindhu natia tan mezüngsüa, India tenüng nung Olympics nung shilem agitsü jenjang nguogo.
Saina den külemi, Sindhu-ia Olympics nung shilem agitsü jenjang anguba ajanga taküm mezüngsüa tetsür singles asayar ana tashi India tenüng nung Olympics nung toktepa shilem agitsü jenjang angur kümogo.
India’er tebur doubles asayar, Manu Attri o B Summeth Reddy nati tan mezüngsüa, India tenüng nung Olympics nung shilem agitsü jenjang anguba osang angazükogo.