Saina-i Syed Modi Grand Prix nung shilem magitettsüsa akümer

New Delhi, January 26 (Agencies): India’er tetsür badminton asayar mongin, Saina Nehwal-i taruba Mongolbar nü nungi tenzüka India kübok Lucknow yimti nung asayatsü ayongba Syed Modi Grand Prix Gold badminton asayamong nung shilem magitettsüsa akümba osang ka metetdaktsüogo.
Uttar Pradesh Badminton Association (UPBA)-i ayongba asayamong nung shilem agitsü asoshi World No.2, Saina-i taoba mapang metetdakja liasü saka la tetsüng yirua aliba yong tan asayamong nung shilem magitettsüa akümba osang tan metetdaktsür lir.
“Kü tetsüng tajungba akümtsü tenzükogo. Ajisüaka, ni asayamong nung toktepa shilembo magitettsü. Ni shilem agiba asaya ajunga nung tajungtiba asayatsü jangrar anungji, ni tan asayamong nung shilem magitettsü,” ta Saina-i ashi.
Tetsür World No.1 jenjang  ngua yaküm 2015 küm kanga junga shilem agila, Saina-i yaküm December ita Dubai Masters nung shilem agiba sülenbo tanü tashi asayamong ka nung danga shilem agia mali.