Saina Nehwal China Open final-i iogo

Fuzhou, November 14 (Agencies): Defending champion, India tsür Sania Nehwal-i China tsür, Yihan Wang madak semifinal asaya koka tang tasayadak China Open Superseries Premier tennis asayamong tetsür singles shilem indang final asayatsü jenjang tanü Honibar nü nguogo.
Tan asayamong nung temaba jenjang abenla, Saina-i tanü minute 42 nung points 21-13, 21-18 ngua taoba World No.1, Yihan semifinal asaya nung tsükdaktsü.
Tan takok anguba ya Saina-i Asian Games gold medallist, Yihan madak 3 ben tashi atonga takok angur lir.
Ano, tan final asayatsü jenjang anguba ya tetsür World No. 2, Saina-i taküm 2016 küm tenzüker tanü tashi nung asayamong 5 buba indang final nung shilem agitsü jenjang angur lir.
Hyderabad tsürla, Saina-i Olympic champion, China tsür Li Xuerui den final nung ajuruteptsü.
Taoba asaya 5 nung takok anguba densema, Li-i tanü tashi nung arishi küm 25 tain Saina den 11 ben tashi ajurutepa asayaba sülen Saina madak 9 ben tashi takok ngua lir.
Ano külen, taoba tebur World No. 1, Lee Chong Wei-i China nunger Lin Dan madak semifinal asaya koka tebur final asayatsü jenjang tanü anguba osanga jangjaogo.
Malaysia nunger Lee-i tanü points 17-21, 21-19, 21-19 ngua double Olympic champion, Lin semifinal nung tsükdaktsü.
Tan takok anguba ya arishi küm 33 tain Lee-i küm 3 nung tan mezüngsüa Lin madak takok angur lir.
Lee-i World No.1, China nunger Chen Long den tan Deobar nü final asayatsü.