Saina Nehwal-i Padma Bhushan sempet agizükogo

New Delhi, March 28 (Agencies): India’er tetsür badminton asayar mongin, Saina Nehwal-i Padma Bhushan sempet tanü, Hombar nü agizükogo.
New Delhi kübok Rashtrapati Bhavan nung agiba Civil Investiture sentong nung India Tir, Pranab Mukherjee-i Saina nem India indang tematiba civilian sempet tasembuba, Padma Bushan sempetji amoktsü.
Saina-i 2009 küm Arjuna Award aser 2010 küm Khel Ratna o Padma Shri sempet agizüka liasü.
India’er tennis asayar, Sania Mirza-ia saisapongtsü shilem nung Padma Bushan sempet agizükba osang jangjaogo.
Tetsür lasang toktepa kashishir, Deepika Kumari-i India indang tematiba civilian sempet pezübuba, Padma Shri sempet tanü agizüka liasü.
Sania, Mirza aser Kumari nungeri saisapongtsü shilem nung takok jenti ngua India nem konang nungsang bener arutsüba nüngtem nung par asem nem nungtugu sempetji agütsür lir.
Grand Slam takok 2 tashi densema, Mirza-i Switzerland tsür, Martina Hingis den külemi lungjemer tongti takok marok 9 tashi yaküm agizüka tetsür WTA doubles rankings nung World No. 1 küma kangasa junga shilem agiba osang bushitogo.
Taküm, 2016 küm tetenzüklen asayaba Australian Open asayamong nunga arishi küm 29 tain Mirza o Hingis nati tetsür doubles quarterfinal tonga asaya liasü.
Arishi küm 25 tain Saina-ia yaküm All England aser World Badminton Championships nung silver medal agizükba den külemi, India Open Super Series aser Syed Modi Grand Prix Gold asayamong takok marok agizüka India nem konang tulu bener arutsüogo.
Deepika-ia Archery World Cup Final nung silver agizükba den külemi, World Cup Stage II aser Asian Team Championships indang bronze medal agizüka India tenüng nung kanga junga shilem agiba osang bushiteta lir.
Arishi küm 21 tain Deepika-i külem sensotsür, Laxmirani Majhi aser Rimil Buriuly na den külemi lungjemer World Championships team silver agizükba osanga jangjaogo.
“Kü nem Padma Bushan sempet agütsüba atema kanga pelar. Ni tarutsü mapang nunga takok ngua India nem konang bener arutsütsü nangzüker,” ta Saina-i sempet agizükdang metetdaktsü.