Saina o Srikanth na World Superseries Finals nung shilem agitsü

Dubai, November 25 (Agencies): Saina Nehwal aser Kidambi Srikanth nati küm tatemlen asayatsü ayongba tongti badminton asayamong, BWF World Superseries Finals nung shilem agitsü jenjang tajung tanü Bodbar nü nguogo.
Alima ajunga nung temaba jenjang 8 nung alir badminton asayartemi dang tebur & tetsür singles aser tebur, tetsür & mixed doubles densema shilem 5 lemsar asayatsü ayongba Superseries Finals asayamong nung shilem agir.
Tetsür World No. 2 Saina-i tetsür Superseries singles asayar tarsensen nung 5 buba jenjang ngua taruba December ita 9-13 nü tashi Dubai nung asayatsü ayongba Superseries Finals nung shilem agitsü jenjang ayong ayonga angu.
Srikanth-i tebur Superseries singles asayar tarensen nung 9 buba jenjang ang angu saka China nunger Tian Houwei-i shilem magitettsüsa akümba yong Srikanth-i iba tongti asayamong nung shilem agitsü jenjang angu.
Tian-i tebur asayar tarensen nung 7 buba jenjang angu saka linük ka nungi asayar 2 dak tema nem iba asayamong nung shilem magidaktsütsü lemteta aliba yong 1 buba aser 5 buba jenjang angur, Lin Dan aser Chen Long nati par China tenüng nung shilem agitsü jenjang ngua Tian-i Superseries Finals nung shilem magitettsüsa aküm.
Saina o Srikanth nati yaküm 2014 küm asayaba Superseries Finals nunga shilem agiba osang jangjaogo.