Sainik School Punglwa nung sobaliba sentong ka agi

Dimapur, Monupii 08 (TYO): Kaketshirtem taküm nung tesem ajungalen renlokba nung ajungshitsü nükjidong nung Inter House Cultural Competition sentong ka Sainik School Punglwa nung Monupii/May 3 aser 4, 2018 anogo nung agiogo.
Iba sobaliba sentong ya Sainik School Punglwa nung azünger cadet tem jakla balala nung asendenshidaktsütsü mechi ayongzük. Iba sentong ajanga kaketshirtem yimya aser sempet balala temai adoka sayur aser kati ka tali tajungba nung meteta tali longjemshidaktsür, ta PRO (Defence), Col C Konwer-i sangdong ka nung metetdaktsü.
Iba sentong nung cadet temi skit, mime, group dance, group song, master of ceremony aser Madhya Pradesh aser Nagaland indang tetsütebu tsüngsangtem nung shilem agia liasü. Iba sentong ya ‘Ek Bharat Shrestha Bharat’ omen nung ajemdaker agi.
Kasa sentong nung Principal, Gp Capt Sharad R Keskar tongti tesemdanger liasü aser pai sentong nung shilem agirtem aser tesayurtem den tepela lemsatep.