Saink School Punglwa-i “Runs For Unity” sentong ayongzük

Kohima, Mongputeni/October 31, 2019 (TYO): Sardar Vallabhbhai Patel sor küm 144 ajungba benjungmung den külemi linük ajungkettsü asoshi pai mapa tajung inyaka yutsüba bilemteta tetushi agütsütsü nüngtem nung, October 31, 2019 Brehostibarnü, Sainik School Punglwa-i ‘Run For Unity’ sentong ka ayongzüka liasü, ta PRO (Def) sangdong ka ajanga metedaktsü.
Iba sentong ayongzüktsüba ya lokti tajungba/ajungkettsütsü mechi nüburtem dang ‘Unity in Diversity’ osang sangdongtsü aser nübur tsüngda telongjem akangshidaktsütsü nükjidong nung lir.
“Runs For Unity” sentong nung cadets, staff aser officers ajaki shilem tajung agia liasü. Iba omen tawabangba kübok sentong nung shilem agirtemi km 4 asemtepa liasü.
Iba sentong dak sendakba nung assembly sentong balaka alakteta agi, kong Cdt Masen Kodak-i ‘Sardar Vallabhbhai Patel’ taküm otsü nung ajemdaker jembi aser kasa mapang sentong nung shilem agirtem ajungshia liasü.
Maneni, cadets aser staffs temi ‘Rashtriya Ekta Diwas’ tenangzükba agi aser linük nung telongjem, integrity aser security wazüka ayutsü asoshi bangjem, ta kasa sangdong ajanga metetdaktsüogo.