Saisapong ajanga nüburtem lungjemdaktsür: Rio

February 28, 2017 nü Kohima Local ground (Khuochiezie) nung Angami Sports Association Golden Jubilee Celebration sentong nung MP. Neiphiu Rio-i o kembiba noksa nung angur.

Kohima, February 28 (TYO): “Saisapong ya temang anema alitsü asoshi atema dang masü saka iba ajanga linük balala nungi tamangba yimsü balala amanger ajunga lungjemdaktsür,” ta MP Lok Sabha, Neiphiu Rio-i Kohima Local ground nung Angami Sports Association (ASA) Hon Jubileemong sentong nung ashi.
“Tanü tensa nung raratsü asoshi masü saka linük ajunga nungi saisapong nung tokteptsü asoshi lanur tajungtem shimteta yoker aser iba ajanga yimya tajung angazükba dang masü, saka telongjem aser yimjung bener arur,” ta pai ashi.
“ASA tenzükertemi nükla tajung yur iba lokti tenteter küm 50 ajungba ya Angami nunger asoshi takok tulu lir, aser tsüraburtemi mapa tajung inyakteta yutsüba ya Angami nunger asayartemi bendanga agüja, meranga inyaka jenjang temabai ajungkettsüla” ta pai jubilee munger ayongzük.
Old MLA hostel anasa iba Hon Jubilee nüngshilong mazüngtsüdang, Dimapur nung January 31 aonung lanur ana kahsetba leper nung, MP-i naro inoktsü aser asür nem akhüm agüja minute ana süngjema ali.
Iba asayamung nung Northern, Southern, Western aser Chakro Angami nung yimtsüng 80 nungi asayar 500 shi adenshia hopta tepiyong asaya tabu balala nung tetokteptsü.
ASA küm 50 ajungba nüngtem nung parnok indang ‘Jubilee mascot’ ya Indian Postal Department indang envelope aser stamp nung inoka amshitsü renemogo.
Iba sentong nung Angami nunger kentener tejen, Methaneilie Jutakhrie-i ASA omen ken aten aser ASA saisapong zülur, Khriesamhale Santsu-i asayar tezüngzüktep sentong agi.