Saisapong nung ranglokdi

Russia linük nung FIFA World Cup asayatsü atema joko hopta ana shi dang lia asen Naga lima nunga yimti-yimdong nung peii sapuba team/linük indang wako gari nung alenloker senzüba aser pei kidang wako songa aliba ajanga asenoki saisapong balala, talisa football asayatsü aser reprangtsü jangraba kuli sayur. Ajisüaka ano külenbo, asenoki jangraba denji putepa National aser International jenjang tashi nung asayatettsüsa asenok Naga nunger adoker ma? ta bilemer. Asen Naga nunger aikati football asayatsü jangrar aser asayar, mesüra masayatetaka reprangtsübo jangrar. FIFA World Cup asaya tembangshia lanur aika iba asaya ajanga ajungmesor, yamaji taküm World Cup reprangba sülen-a lanur aikati iba asaya asentenshir asayatsü, ajisüaka iba tejangrabaji khen atema dang asütsü asü taküm piyong atema asütsü?; state sorkaria saisapong jangrar lanurtem atema saisapong infrastucture koma ajungkettsütet? ta shisadangtsü nüngdak. Akhidangbo kentenmenü aser saisapong ya pei tejangraba nung ajemokba aser pei sempet amshiba dak alia sen anguba lenmang kabo masü liasü. Ajisüaka tanüasüngbo kentenmenü süshia, saisapong süshia tajungertembo sen jenti aazükba luyim ka kümogo. Yamaji tanübo saisapongtsü sempet alirtembo sepai nunga melamela shimoker, parnok sempet sayaba ajanga nüngtugu akumer aser takar küma liteter. Taküm Metsüremi (March) ita nung budget benokdang state Chief Minister, Neiphiu Rio-i, “People’s Democratic Alliance (PDA) sorkar atema tongtibang lenla rongnung kaji saisapong ajungkettsüba asütsü; mongintem, International jenjang nung asayartem aser saisapong ketdangsertem den asüngdangtepa saisapong mapatong sayatsü,” ta metetdakja liasü. Chief Minister-isa, saisapong ya industry ka kümdaktsütsü atema sorkari asalentong yanglutsü, aser ibaji ajanga lanurtem ajangzüktsü, ta shiogo. Ibaji ajanga sorkari asentenshir lanurtem atema saisapong nung ranglokba sayur. Atangji sorkari saisapong jangrar lanurtem nem sabang agüja parnok sempet arangshitsütsü atema nangzükbaji koda tajung. Ajisüaka teshisadangtsü kaji- sorkari jembiba amaji inyakdi ma? aser lanurtemia tazüokba nung pei sempet tajungtiba nung arangshitsü atema sorkari agütsüba maongkaji agitetdi ma? ta bilemer. Tang tashi nungbo Nagaland nung asayar tajung adoktsüsa asayaba moapu (stadium) tajung mali. Kidanger state tem- Assam, Manipur aser Mizoram nung aliba asayaba moaputem den medemdangra asen state nungbo asaya moapu tajung kata mali. Tang Kohima, Dimapur aser Mokokchung district tem nung aliba asayaba moaputem jenjangji reprangdangra, tzüngluruwa mongpu nungbo tzülu den kanga tepila mali. Iba ama jenjang ka nung asenoki regional jenjang nunga tangar den toktepa masayatettsü. Sorkari saisapong associations/federations nem tashi tulu agütsüyonga, district shia nung saisapong infrastructure junga ajungkettsüyonga, T Ao Regional Football Academy aser Sports University amenokaka saisapong jangrartemi pei taküm tazüokba nung kanga nendaka pei sempet marangshira item ajakji amajok asütsü. Taruba World Cup asaya reprangdang sorkar tashi nung alirtem aser saisapongertemi item ajakji asadanga aser medemdanga reprangra asaya jangratema reprangba dang masü saka iba dang nungjagi tali  angazüktsü südi.