Saketh Myneni-i tan mezüngsüa US Open nung asayatsü

New York, August 27 (Agencies): India nunger tennis asayar, Saketh Myneni-i Serbia nunger Pedja Krstin madak qualification asaya koka, tan mezüngsüa US Open asayamong nung shilem agitsü temeten yashi, Hokolbar nü nguogo.
Myneni-i yashi points 6-3, 6-0 agi Pedja tatembangba tebur singles qualifying round asaya nung tsükdakja jenjang tajungji ajangzük.
India’er tebur tennis asayar rong nung temaba jenjang abensang, Myneni-i tennis asayatsü tenzüker tanü tashi nung ATP Tour asayamong nung toktepa shilem agitsü jenjang ken danga mongui aruogo.
Pai par 1 buba US Open asaya World No. 48, Czech Republic nunger Jiri Vesely den asayatsü lemzükogo aser pai iba asaya nung takok ngura, Myneni-i par 2 buba round World No. 1, Serbia nunger Novak Djokovic den asayatsü lemzüktsü akok.
2016 US Open tebur aser tetsür singles asayar tarensen nung arishi küm 28 tain Myneni-i dang India tenüng nung toktepa shilem agitsü temeten ngua lir.
Tebur ATP asayar tarensen nung 143 buba jenjang nung alisang, Myneni Australian Open qualifying asaya 3 buba round nung tsük aser French Open nung shilem agitsü asoshi agiba tetendangba asaya round 2 buba nung tamakok ngua liasü.