Sakhi-One Stop Centre-i awareness sentong katsügo

Wokha, Luroi/August 09, 2019 (TYO): Springdale School, Wokha nung August 09, 2019 Hokolbarnü Sakhi-One Stop Centre (OSC)-i OSC inyakyim indang nung awareness sentong ka takok ngua ayongzüktsüogo.
Sentong nung OSC kübok intern, Myingthunglo Odyuo-i, lendong tapu balala indang jembi. Iba mapang, Odyuo-i kaketshirtem dang, tetsür aser tanur/tanur tetsür küm 18 tekübotemji beneficiary lir. Iba beneficiary ajanga Centre nungi medical, legal, psychological aser counseling densema emergency aser non-emergency services teyari angutsü, ta ashi.
Case Worker OSC, Wokha, Advocate, Nancy-ia, Act, 2012 (POCSO) nung shia aliba ama, tanurtem dak mapa tamajung inyakba nungi tekümzüktsü agütsütsü indang nung ajemdaker lai, iba Act ya tanurtem dak mapa tamajung inyakba, amokmerenba aser pornography nungi kümzüktsü, kasa mapang judicial inyakyim nung tanurtem kümzüka ayutsü asoshi lir, ta ashi.
Laisa, kaketshirtem dang nisung temang nung aketba shilem pezü indang rasa ashi aser pei maginütsüsa kari danga iba shilem pezü rongnung ka nung danga tim mesüi kongshira, parnoki pei tsürabur, tesayur mesüra temulung adokba taintem dang mesüra Police dang metetdaktsütsüla, ta shisem.
Sentong nungsa Sakhi-One Stop Centre-i tesayur o kaketshir tem nem Domestic Violence, Cyber crime aser toll free number 181 indang flyers aser pamphlets lemja liasü.