Sakshi Maharaj-i Muslims aitsüba atema EC-i arrtsüogo

New Delhi, January 12 (Agencies): Tawa BJP MP, Sakshi Maharaj-i linük nung nütsüng tali arenba atema Muslim nunger nem tai tongloktsüba atema Election Commission-i pa arrtsüba den külemi, tarutsü nung pai maneni Model code of conduct (MCC) anema inyakra temerenshi tulu agütsütsü, ta metetdaktsüogo.
Election Commission-i, “MP-i (Sakshi) telangzüba agütsüba jagi melung masür, kechiyong Commission-i ibaji asadangogo aser Supreme Court-ia, election nung tamangba yimsü nung ajemdaker lokti tsüngda tesempatep adokdaktsütsüsa jembibaji MCC alema inyakba lir ta shiogo,” ta metetdaktsü.
January 4 nü Election Commission-i Uttar Pradesh, Uttarakhand, Punjab, Manipur aser Goa nung assembly election agitsü sangdongba mapang nungi Model Code of Conduct (MCC) benoka lir.
Sakshi Maharaj-i Commission dang, pai iba oji lokti nung mesüra election senden ka nung jembiba o masü, anungji ibaji MCC anema inyakba masü, ta shia liasü.
Ajisüka EC-i, “Anungji nai MCC alema inyakba aser Supreme Court telemtetba anema inyakba atema Election Commission-i na arrtsür, aser yimtenren lenir/MP ka ama election mapang nung lokti nung nai kümdanga jembitsü imlar,” ta ashi.
“Tarutsü nung nai ano maneni MCC alema inyakra Commission-i tashi ajak amshia nü nem temerenshi tulu agütsütsü,” ta Election Commission-isa metetdaktsü.
Taoba hopta Meerut nung ‘sant sammelan’ sentong nung jembidang BJP lenir Sakshi-i, linük nütsüng tali arenba ajanga linük nung timtem lir. “Ibaji Hindu nunger tai ajanga masü. Ibaji kinüngtsü pezü aser tanur 40 aliba indang jembirtem tai ajanga lir,” ta jembia liasü.
Supreme Court-i, yimtenren party tem aser candidate temi tamangba yimsü mesüra kin-kidong amshia vote mayimtsüla, ta obendang agütsüba sülen anogo ishika tsüngda Sakshi-i iba oji jembia liasü.