Sakshi Malik India asoshi medal agizüker 1 buba asayar kümogo

Rio de Janeiro, August 18 (Agencies): India’er tetsür toktepa melangteper, Sakshi Malik-i tetsür temang touzük seret 58 taret freestyle tetoktepba bronze medal agizüka otsü tasen yashi, Bodbar nü yangluogo.
Sakshi-i points 8-5 agi Kyrgyzstan tsür, Aisuluu Tynybekova madak takok ngua medal agizükba sülen tan Olympics asayamong nung India asoshi medal agizüker mezüngbuba asayar aküm.
Karnam Malleshwari, Mary Kom aser Saina Nehwal nunger sülen anidaka, Sakshi ya India tenüng nung Olympic medal agizüker asayar 4 buba akümer lir.
Russia tsür, Valeriia  Koblova den asayba quarterfinal asaya nung Sakshi-i points 2-9 ngua tamaok ajuru saka Koblova-i final asayatsü jenjang anguba yong Sakshi bronze medal asoshi toktepa shilem agitsü maongka angu.
Rio Olympics anogo 11 tashi nung India teloki medal ka danga magizükteti aruba sülen Sakshi-i tan medal agizüka, India jenjang tajungba kümdaktsür lir.
Olympics asayamong nung medal angur asayar shia nem Rajiv Gandhi Khel Ratna agütsütsü asoshi India sorkari renema aliba yong Sakshi-i tan Olympic bronze medal agizükba sülen iba tongti sempet agizüktsüsa jenjang tajunga nguogo.
Sakshi dak alaka, Rio Olympics nung bronze medal tera agi majangzüktetla, gymnast Dipa Karmakar aser prangpong toktepa kashishir, Jitu Rai na tenünga Khel Ratna sempet agütsütsü asoshi tenüng benoka lir.
Ano külen, taküm October ita 14-16 nü tashi Mumbai yimti nung agitsü ayongba International Fitness Festival tayonger, Asian Business Exhibition & Conferences Ltd. (ABEC) aser Sheru Classic nati Olympic bronze medal agizükba nüngtem nung Sakshi nem senpet sen lakh 5 tashi agütsütsü tenangzükba olen ka metetdaktsüogo.
“Sakshi-i Olympic medal agizükba ajanga India nem konang nungsang tulu bener arutsüogo. Lai takokba aser naroküm tajung bener arutsüba nüngtem nung ozü tenteti la nem senpet sen lakh 5 agütsütsü renema lir,” ta ABEC nung Executive Director, Manish Gandhi-i osang jangjashitsü.