Sakshi, Sindhu, Dipa & Gopi nunger nem BMW gari kaka sempet agütsütsü

Hyderabad, August 27 (Agencies) : Rio Olympics nung India tsür medal angur, P V Sindhu aser Sakshi Malik na den gymnast Dipa Karmakar aser badminton coach Pullela Gopichand nunger nem asüng, Deobarnü Hyderabad nung sentong ka ayonga BMW gari kaka sempet agütsütsü.
Parnok pezüi pei lu nung takok tulu ngutetba atema iba sempet tulu ya Hyderabad District Badminton Association nung Tir, Chamundeshwarnath-i agütsütsü.
Gopichand Badminton Academy nung agiba sempet agütsüba sentong nung cricket otsüsütsüsa asayar aser Rio Olympics nung India nungi goodwill ambassador, Sachin Tendulkar-i gari sabi agütsütsü.
Tesüiba mapang cricket asayar aser shishilembar, Chamundeshwarnath-i mezüngbo BMW gari ji Sindhu nem ang agütsütsü ta ashi, ajisüaka iba sülen parnok asem nema agütsütsü lemtetshi.
Tawa tembangba Rio Olympics nung Gopi-i training agütsüla, Sindhu-i tetsür badminton kija asaya nung silver medal angu aser Sakshi-i tetsür temang touzük seret 58 taret melangteptsü tetoktepba nung bronze medal angu. Dipa-ia gymnastics nung 4 buba jenjang ngutet.