Salangtem GMS-i asür Taliakum tenüng nung Literary day amung

Dimapur, November 7 (TYO): Salangtem Government Middle School Mokokchung nung literary day amung aser iba sentong ya asür Taliakum Pongen bilemteta mungogo.
Asür Taliaküm ji Salangtem GMS nung English tesayur ka liasü aser pa taküm February ita akümli toktsür ao.
Literary day ji shilem ana lemsar agi aser mezüngbuba shilem nung asür Taliakum nem tetushi agütsüba sentong ka agi. Iba sentong nung Class 8 nungi Toshisenla aser class nungi Imkongsashi nati asür tesayur nem ken aser sangro ajanga tetushi agütsü.
Salangtem GMS head Teacher, Chubamenla-i o jembidang, “asür Taliakum ji kanga dang tenendak tesayur ka liasü” ta ashi.
Paji mangdang aketba nisung ka aser shisatetba sempet aliba ajanga nisungtem ajungmeso aser talisa pai par kaketshirtem kanga ajungmesoa liasü. Pai loktiliba atema dang masü saka kaketshirtem atema kanga dang bendanga agüja inyak, ta Chubamenla-isa shisem.
Class 6 nung azünger Mariam-i ashiba agi, lar Sir ji tesayur ka ama masü saka lar medemer ka ama liasü.
“Pai kü dang kententsü sayu. Pai teti school-i gari balaka nung aru aser onok dang lesson sayu aser angazükdaktsü” ta laisa metetdaktsü.
Iba sentong nung asür Taliakum’er kinungertem aden aser parnoki, “asür Taliakum nem tetushi agüja iba sentong ayongzükba ya ozü kibong asoshi akhüm aser temoatsü tulutiba lir” ta ashi.
Parnokisa kaketshirtem dang asür Taliaküm taküm nungi angazüktsü aser iba school nungi pa mesükba kaketshirtem aika adoktsü moatsür, ta ashi.
Literary day tanabuba shilem nung declamation, speech, solo, painting aser synchronized Bible reading tetoktepbatem agia liasü.