Salangtem nübur nem lendong atalokdang langzütsü tesayuba agütsü

Mokokchung, Nov 2 (TYO): Home Guards & Civil Defense (HG&CD) Mokokchungi ayongzüka alima yimya lendongtsüdong tapu balala atalokba mapang taküm kümzüka aser jenbuba alitsü asoshi tesayuba sentong tajung ka Salangtem Community Hall Mokokchung nung agiogo.
Iba sentong nung Salangtem ward Mokokchung kübok ward yimden, watsü telen, lanur telungjem, Social Service Society, G.M.S Salangtem, U.E.M.B, Ongpangkong Block ASHA-tem, Urban Health Committee, Education Board item telok balala nungi ketdangsertem densema shilem agia denogo. Mokokchung HG & CD Commandant, Watilemba lenisüba nung par külem medemertemi yaritepa iba sentong takok ngua agia liasü.
Iba tesayuba sentong nung tongtibangsa; yirudang bandage alepbayim, tangu mesashiteti süja or alidang shia arudaktsüba yimya (CPR=cardiopulmonary resuscitation), tangu sashiba lenmang nembanger alidang anepaluba tasa (FBAO=Foreign body airway obstruction), tekolak/terongtong yirudang anepalubayim, tetsü-tepen yirudang alenba yimya, lendong nungi kümzükba tasa balala aser sangzü alenba yimyatem sayua liasü.
Alima lendong tapu balala atalokdang mezüng langzürtemji nüburtem lir, aser yimya agi tekümzüker teloktemji mapang shitak nungbo maruteter, anungji, nüburtem kümzüka alitsü asoshi iba ama tesayuba ya kanga nüngdaker, ta Mokokchung HG & CD Commandant, Wb. Watilembai osangzülurtem den jembidang metetdaktsü.
Alima lendongji koba mapang nung ataloktsüar shingaia ashitsü makok, lendongi kodanga osang agütsür marur, aji oda, lendong atalokba mapang asenoki nübur yaritettsü asoshi tekümzükba tasa metettsü nüngdak. Anungji, mapang shia iba ama tesayuba agütsüba ajanga nübur rongnung kümzükba tasa tapu balala angazüktsü imlar, ta paisa ashi.
Mapang shia Home Guards & Civil Defense (HG&CD) Mokokchung ajanga school, college aser nüburtem nem iba ama alima lendong balala atalokdang langzütsü asoshi tesayuba balala agüja aruba osang ajanga angazüker.