Salman den shilem agiba tanur Harshaali kanga saputeper

Mumbai, July 29 (Agencies) : Arishi küm 6 tain Harshaali Malhotra-i Bajrangi Bhaijaan film nung Munni ta ser shilem tajung agiba ngua nisung aikati la sapur.

Harshaali Malhotra ya March 6, 2008 nü Mumbai nung aso aser la Seven Square Academy nung azünger.

Bajrangi Bhaijaan film nung shilem agitsü shimtsü asoshi tetsür tanur 5,000 jungnüa kati tenüng agütsü aser parnok rongnungi Harshaali shimtet.

Harshaali-i TV serial Qubool Hai (2014) aser Laut Aao Trisha (2014) nung shilem agiogo aser Fair & Lovely, Pears, HDFC Bank o Horlicks nunger asoshi TV commercials & print ads nung adokogo.

Bajrangi Bhaijaan film nung lai shilem agiba ngua nisungtemi la sapuba mapang YouTube nung video ka nung Harshaali atangji nung yimyatsüya sayua lir. Iba video ngua ano la sapurtem timba kümogo.

Minute asem video clip nung Harshaali-i director Kabir Khan indang tenipong nung tebang meseper aser Salman dak azüiter. Tenapronglai la dang temeim sayua kasaji inyaker.

“Ni Salman Uncle kanga meimer. Ni pa den külemi shilem agitsü ta angashiba sülen, ni anogo ana tsüngsang” ta Harshaali-i ashir.

Harshaali ya kanga kara angazüker ka lir. Director Kabir Khan-i ashiba mezüng nungbo film yangludang timtem ajuru.

Arishi küm 6 tanur ka film set nung kazütsübaji mapa tasak liasü aser langka danga asünunga la nüktzü alua ajeb. Mezüngbo ‘action’ ta ashiba angashidang la ajeb.

Ajisüaka, lai kanga kara angazükba ajanga film takok ngua yanglutet.

Bajrangi Bhaijaan ya Salman Khan indang film rongnung tajungtiba ta jenjang nguogo aser box office nung sen crore 300 jungnüa aazükogo.