Salman-i Bigg Boss 9 sayatsü anogo metetdaktsür

Mumbai, September 23 (Agencies): Nüngtugu nisungtemi shilem agiba reality television sentong, 9 buba Bigg Boss sentong ‘Double Trouble’ omen nung ajemdaker sayatsü renemba osang ka sentong anisang, Salman Khan-i tanü Bodbar nü metetdaktsüogo.
Bigg Boss tenzükba sentongji taruba October ita 11 nü sayatsü aser tanüngba sentongtemji hopta shia Hombar nungi Hokolbar aonung 10:30 ako nungi tenzüka sayutsü renemba osang ka arishi küm 49 tain Salman-i metetdaktsü.
Teprangertem kanga dang puadaktsüba Bajrangi Bhaijaan film nung tongti shilem agisang, Salman-i tan agi 6 benbuba atema Bigg Boss sentong ya anitsü renema lir.
Ajisüaka, iba sentong nung shilem agitsüpur ajungabo tanü tashi renema maliba yong iba sentong nung shilem agitsüpur tarensenbo tanü tashi nüburtem dang memetetdaktsüi lir.