Salman-i MSCW nem telangzüba agütsüogo

Mumbai, July 14, 2016 : Maharashtra State Commission for Women (MSCW)-i Bollywood actor Salman Khan “Sultan” film tangoker külem, tashiyim agi raksatsüba tetsür amai kümogo ta ashibaji kechi tebilemba nung ashi ta asüngdangba nung pa telangzüba agütsüogo, ta Brihostibarnü top official sangdong ka ajanga metetdaktsü.

“Pa telangzüba onok nem tanü tongtsüogo. Iba telangzüba kanga junga asadanger külena kechi tapet ibaji inyaktsü. Tang tangbo pai langzüba tema adoka melemsatettsü,” ta MSCW mendenbula Vijaya Rahatkar-i IANS dang ashi.

Taoba aser tan Brihostibarnü MSCW-i pa dang iba o kechi tebilemba nung jembi ibaji rateta ashitsü atema Salman jaoka liasü saka pai mao.

Iba telangzübaji affidavit nung agüjang ta MSCW-i Salman nem tetuyuba agüja liasü.

June 29 aser July 7 anogotem nung MSCW-i pa jaoka liasü aser iba den külemi iba den sentakba nung National Commission for Women (NCW), New Delhi-i pa dang parnok den ajurutepa telangzüba agütsütsü tetuyuba agütsü.

MSCW-i pa anaben tashi jaokba mapang Salman-i pa okatsür ajanga parnok dang iba ken o ya NCW nunga tepdaka lir anungji parnoki iba tsütsü mera magitsü mepishi, ajisüaka Rahatkar iba temepishiba magizük.

“NCW aser onoki inyakyim ka dang lir. Iba tatalokba ya state sasep nunga angadangtsü nüngdak. Anungji pai mepishibaji magizüker,” ta Rahatkar-i ashi.

“Sultan” film mesaya tsüngda osangbenertem den sensaksem ka akaba mapang Salman-i, ni melangtepba shilem ka agiba sülen ‘tashiyim agi raksatsür aliba tetsür ka amai kümogo” ta shia liasü.