Salman indang ‘Bharat’ film 2019 Eid nung sayatsü

Mumbai, October 25 (Agencies): Benjung mapang nung pa indang film sayaba yimya nung maneni anidaka Salman Khan-i pa indang taruba film ‘Bharat’ 2019 küm Eid nung sayatsüba atema mekazüka yuogo.
Iba film ya 2014 küm adokba South Korean film ‘Ode to My Father’ Hindi nung ajizüka yangluba film ka asütsü. Iba film nung nisung taküm otsü ka ajanga 1950 nungi tang tashi Korea nunger otsü melenshia aruba indang sayur.
Film nung tongtibang tatalokba; 1950 Korean War mapang Hungnam Evacuation, sorkari 1960s nung nurse aser miner tem West Germany-i yoktsüba atema telemtetba agiba aser Vietnam War nunger densema lir.
Iba film ya India nunger asoshi tapet asütsü, ta Berlin Film Festival nung iba film screen asüba sülen ngutet, kong film yanglur Atul Agnihotri dena liasü. Pai iba film ya produce asütsü, ta osang ka ajanga metetdaktsü.
Iba film nung nisung ka indang taküm otsü 1947 nungi tenzüka 2002 tashi sayutsü.
Agnihotri shiba Salman teko lir, pai ashiba agi: “Iba ya linük ka aser nisung taküm ka indang tajangshiba otsü lir, kong nisungba o linük na prongla tenüng ya Bharat lir.”
“Iba film ya onok asoshi tetenzüker dang lir, saka iba ya tajungshiba ka asünung onoki officially iba film yanglushitsüba atema temeden agizükner,” ta pai-sa ashi.
“Bharat” film ya Ali Abbas Zafar-i direct asütsü aser Salman-i tongti shilem agitsü.
“Ni producer ka ama shilem tajungba agitettsü amai bilemer. Ali ya medemer ka lir aser ni pa mapa kanga meimer. Ni pa den jembira iba film atema pa tejangraba ta metettsü,” ta Agnihotri-i ashi.
Pai-sa ashiba agi, Salman den inyaktsüba ya khuret tulu lir kechiyong ajaki tuluka imlar.
“Ni Salman sapur aika aliba jangjaa lir aser parnoki imlaba jangjaa lir. Maneni iba film ya kibong rangben külemi reprangtetba film ka lir aser benjung mapang sayatsü tetemsü. Producer ajaki Eid mapang nung film sayatsüba jangrar,” ta pai-sa ashi.
Iba film ya taruba küm April ita sayatsü asoshi renema lir aser film tangoktsüba atema tesem balala aikati aotsüsa akümtsü.
Iba film ya India nung Punjab aser Delhi nung tangoktsü aser Abu Dhabi o Spain na nunga shilem kar tangoktsü.