Salman Khan amokmerenba Salim Khan-i jangjashitsü

Mumbai, Aenjeti 12 (Agencies): Anogo eshika ogo, Rajasthan gangster, Lawrence Bishnoi-i Race 3 actor, Salman Khan ya Jodhpur nung tepsettsü amokmeren, kong pai ‘blackbuck’ khasetba ken o angadangi ao. “Salman Khan ya yangi Jodhpur nung tepsettsü…Iba sülen pai onok indang tejangja metettsü,” ta Bishnoi-i Jodhpur court-i aoba mapang ashi. Salman ya Mumbai-i arua pa indang taruba Race 3 film Jacqueline Fernandez den tangok tenzükaka, pa amokmerenba manener. Rasemnü Mumbai police temi Race 3 tangokba ya anendaktsü aser Salman ya Bandra nung par kidangi anir ao.
“Police tem Race 3 film tangokba tesemi arua Salman aser producer Ramesh Taurani na dang iba film tangokba ya tangsa anener Salman ya tekeratiba nung kidangi aotsüla, ta ashi. Salman ya police troki gari ka nung anir ao aser pa indang gari ya police telok kati kidangi anir ao,” ta iba film tangokba tesem nungi osang ka ajanga ashi.
Mumbai police temi Salman dang cycling masütsü aser pa kong aliar, social media nung osangtem melemsateptsü shiogo.
“Bishnoi-i amokmerenba ya onoki süoki ia bilemer saka onoki Salman nung tanükba junga agütsütsü. Bishnoi-i Salman amokmerenba nükjidong bushisüngdang südagi,” ta police ketdangser kati ashi.
Iba amokmeren jangjashija, Salman tebu Salim Khan-ia, “Pa film tangoktsü asoshi koba mapang apusoar ni memetet, aser pa amokmerenba lir, ta ni memeteti liasü. Saka salman anüker team tajung lir. Pa dang iba ama amokmerenba ya tang tasen masü. Iba industry nung nisungtem iba ama amokmeren teti alir,” ta ashi.
Iba gangster anema ken o kar benoktsü asü, ta asüngdangba mapang, screenwriter aser taoba actor, Salim-i, “Onoki inyakba ajunga agi Salman kümzüka ayutsü maparen inyakba ya lir. Pai akhi ama tangoktsü,” ta ashi.
Bishnoi-i Salman tepsettsü amokmerenba ya 1998 küm black buck tepsetba den sendaktepa lir, koba nung Salman aser co-actor tem aitsür. Bishnoi kin ajanga iba ken o ya benok aser iba sülen parnoki Salman ya mapa tamajung inyaker ka ama züngshir.