Salman Khan-i Anushka Sharma junger ta ashi

Dubai  March 19, 2016 : Bollywood superstar Salman Khan-i tang “Sultan” film nung pa den külemi shilem tagidakla, Anushka Sharma dak sempet tajung keta lir, ta tenüng sanga ashi.
“PK” film nung shilem agila, Anushka den külemi inyakdang ajangshiba kar lemsateptsü asündangdang Salman Khan-i, “Anushka ji junger. Sempet tajung keta alir den külemi inyaktsüji jangratemtsüka lir,” ta langzü.
Salman aser Anushka na külemi shilem agiba mezüng film ji ibai asütsü.
“Sultan” film ya Ali Abbas Zafar-i direct asür aser Salman Khan-i melengteper ka ama shilem agidar. Iba film atema Salman temang tera chizükdaktsüogo. Kasa film atema Anushka-a hopta trok tashi training tasak agiogo. La-a iba film nung melangteper tetsür ka ama adoker.
“Sultan” film koma odar ta asüngdangdang “Wanted” film nung shilem agisang, Salman-i, “Kanga meranga inyaktsü nüngdaker…tang tashi nungbo film tanga dang nung ibai tasakba lir,” ta langzü.
Iba film ya Aditya Chopra-i Yash Raj Films kübok produce asür aser taküm July 8 nü sayatsü sentong lir.
Salman ya tanabuba Times of India Film Awards nung shilem agitsü asoshi Dubai International Stadium-i arua liasü.
Iba sentong nung “Dabangg” film nung tongti shilem agisang, Salman-i “Aaj ki party”, “Love me”, “Jalwa”, “Ole Ole”, “Main khiladi tu anari” aser “Hero” kentem nung tsüngsanga shilem agi.