Salman Khan-i Sania taküm otsü kaket sayatsü

Mumbai, July 17 (Agencies) : Deobarnü Mumbai nung Bollywood superstar Salman Khan-i sentong ka nung India tsür tennis asayar Sania Mirza taküm otsü kaket ‘Ace against Odds’ sayatsüogo.
Tan 2016 Rio Olympics nung Sania Mira aser Maharashtra nungi Prarthana Thombare na külem ser tetsür tennis tarep asaya nung shilem agitsü.
“Asian Games nung kenati tetsür tarep asayaba nung medal ngua lir. La ya ano lanur kadang lir aser tarutsü nung la dak nükla tajung angur. Olympics nung asayabaji la atema tajangshiba tulu ka asütsü. Prarthana ya Maharashtra  anülolen Barshi tesem nungi lir aser lai Sania Mirza Tennis Academy nung küm ka ser tesadang asaya arur,” ta Sania-i ashi.
Sania ya tang arishi küm 29 ang saka taküm otsü kaket ka adokogo anungji naia kechi bilemer ta asüngdangdang, Salman-i, “Ibai tangar dang nungi balaka aser inyakyim tasen ka mesüka lir. Akümli asem tashi nunga lai ajangzüktetba majangzüktetsü. Arishi küm 29 ang ser nung la tashitsü aika liasü südi aser lai shinübatem mamadok tsüngda lai kanga dang shisa ka taküm otsü kaket adokogo,” ta langzüa liasü.
Sanai-i, “Ni Andre Agassi taküm otsü kaket ‘Open’ aser tsüngteper Mike Tyson indang taküm otsü kaket züngogo aser item kaket temji kanga junger. Ni Steffi Graff kanga sapur ajisüaka tang tashi la indang taküm otsü kaket mezüngdang. Ni bilemer la taküm otsü kaket ajanga ni kanga ajungmesotsü,” ta ashi.