Salman Khan-i sempet magir: Jacqueline Fernandez

Mumbai, April 18, 2016 : Bollywood superstar Salman Khan den 2014 küm “Kick” film nung külemi shilem agila actress Jacqueline Fernandez-i, Salman Khan-i sempet magir ajisüaka pa nem agütsüba sempet temji India nung tepetzük tia nung alirtem yaritsü atema pai tentetba ‘Being Human foundation’ nem agüjang ta pai ashir, ta metetdaktsü.

“Pa den jembidang pai teti ‘Being Human’ onük süa arua jembir. Pai iba tentet atema kanga bendanga agüja aser meima inyaker. Ya camera nung tangokdar asüba agi ashir masü saka shitakba ajangshiba ashir,” ta Jacqueline-i TV sentong “Yaar Mera Superstar” nung ashi.

“Pa nem kodangsa sempet kar agütsüdir pai yakta dang ‘Being Human’ nem agütsütsü ashir. Pai sempet maginer. Pai kü sasa kü dak temulung alemtsü angatetdaktsü. Pa ya tesayur ajak dang tajungba lir. Pai pei sasa pei dak amangtsü sayur aser pa-a yamaji alir,” ta lai shisem.

Salman Khan ji ni atema tajungmesor tulutiba lir, ta Jacqueline-i ashi.

“Pai nüngdakba pur ajak yarir aser shinga mebendangi ajak den jembishiner. Nisung mashi kati pa den oa jembitettsü. Ni pa dang nungi iba yimya tajung angazükogo kechiba süra ni nüngdakba mapang nisung kari ni yariogo aser ni-a akok tashi tangar yaritsü merangtsü,” ta lai ashi.

Jacqueline shilem agiba “Yaar Mera Superstar” episode ya Mongulbarnü TV nung yoktsü.