Salman Khan-i shilem agi Sultan film agi 3 nü nung sen crore 105.34 aaogo

New Delhi, July 09, 2016 : Salman Khan-i Bollywood box office nung pa ajak dang tajungtiba ta kuli sayutetogo.  Sodi anogo mesüaka, pai shilem agiba ‘Sultan’ film sayar anogo asemnü tashi atonga atonga sen jenti aatsüogo. Salman Khan aser Anushka nati tongti shilem agiba film yagi anogo ananü nung sen 73.7 crore aatsü aser tanü asemnü buba nung sen crore 100 dak tema aatetba film ka kümogo.
Iba film ya zünga Salman Khan-i shilem agiba film 10bubai sen crore 100 dak tema aatsür asütsü aser sen crore 100 dak tema aaba film timba nung shilem agisangji Salman Khan kümogo. Pa sülen Shah Rukh Khan-i shilem agiba film trok agi sen crore 100 dak tema aateta lir.
Sultan film ajanga tesüiba mapang Salman otsü aika ajatetogo. Pai shilem agiba Bajrangi Bhaijaan film agi sen crore 102.60 aser Prem Ratan Dhan Payo film agi sen crore 101.47 aatet. Iba sen ya film sayar anogo asemnü nung aatetbatem lir.
Sultan film agi mezüngnü sen 36.54 aatet aser tananü, Brihostibar, Eid benjung sodi nü, sen crore 37.2 aateta liasü.
Hokolbarnübo sodi anogo masü asüba agi box office nung taoba anogo ananü dang nungi tera tajemba, sen crore 31.50 ang aatet.
Aruya aliba anogo ana ya hopta tatembang anogotem lir anungji box office nung sen tera timba arutsü imlar. Tan hopta tsüngda nung iba film yagi sen crore 150 dang tema aatettsü ta Trade analyst temi asadangteta lir.
Trade mongin Taran Adrash-i, single screen aser multiplex ajak nung iba melangtepba film yagi kanga junga aatsüdar, ta Hokolbarnü ashi.