Salman Khan India’er Goodwill Ambassador shimer

Salman Khan India’er Olympic telok indang goodwill ambassador shimba osang sangoktsüba sentong nung India’er tongti asayar, Sardar Singh (Abelen) aser MC Mary Kom nati Salman den aroki adenba noksa nung angur. (New Delhi, April 23)

New Delhi, April 23 (Agencies): Brazil kübok Rio de Janeiro yimti nung taküm August ita asayatsü ayongba 2016 Rio Olympics nung shilem agitsü asoshi renemba India telok indang goodwill ambassador inyaktsü asoshi Bollywood actor, Salman Khan shimogo.
Salman shimba ya Olympics ama tongti asayamong nung shilem agir India telok indang goodwill ambassador inyaktsü asoshi tan mezüngsüa Bollywood superstar shimer lir.
MC Mary Kom, Sardar Singh, Ritu Rani, Deepika Kumari, Apurvi Chandela aser Manika Batra nunger amala nungtugu asayartemi shilem agiba sentong ka nung Salman goodwill ambassador shimba osangji New Delhi nung tanü, Honibar nü sangoktsü.
“India nungbo cricket asaya reprangba amabo nüburtemi Olympics asaya merepranger. Anungji, ni Rio-i tsüngdong oa India telok aser India nüburtem ajungmesotsü merangtsü,” ta Salman-ia metetdaktsü.
Ano külen, India nung tentetba rongsen ketsüng tentet, Edelweiss Group-ia India tenüng nung Rio Olympics nung shilem agirtem nem sen crore 1 jenjang aketba life insurance agütsütsü renemba osang sangoktsüogo.
Tanü tashi nung India nunger asayar 75-i asaya shilem 8 nung India tenüng nung Rio Olympics nung shilem agitsü jenjang ngua lir.