Salman Khan J&K Brand Ambassador kümdaktsüner: Mehbooba Mufti

March 18, 2017 : J&K Chief Minister Mehbooba Mufti-i Hokolbarnü ashiba agi, Jammu & Kashmir joko yimten yimsüsüba süngjema kümogo aser raliwalirtem (tourism) atema iba state semdangtsü asoshi kecha lendong mali/kümzüka lir.
Chief Minister-i, maongka dang ngura lai Kashmir Valley nung raliwaliba sentong ajungketba nung Bollywood nung nüngtugu actor Salman Khan nem shilem agidaktsüner, ta shisem.
La dang ‘brand ambassador’ asütsü asoshi Bollywood actor karbo aginür maginür ta asüngdangba mapang lai yamai telangzüba agütsü, “Maongka dang ngura, ni raliwaliba sentong ajungkettsü asoshi Salman Khan shimner.”
Mufti-i Mumbai nung lar state nung raliwaliba sentong ajungkettsü asoshi aser director Imran Khan indang film “Sargoshiyan” sayaba sentong nung adentsü, lai Mumbai nung aliba nüburtem dang takümbo Kashmir semdangtsü asoshi ayongzüka liasü.
Süngpenlipen apongba mapang nung state government-i Asia nung ‘Tulip’ atsüki tulutiba, koba Srinagar nung lir, iba tesem nung tulip benjung amungtsü sentong aliba lemsatep. Lai nübur ajak dang iba mapang nung Jammu & Kashmir semdangtsü asoshi ayongzük. “Ozü Kashmir semdangang. Raliwalirtem atema kecha lendong mali,” ta lai ashi.
Iba sentong nung actor tem; Farida Jalal, Alok Nath, Raza Murad, Kaushal Tandon aser Deepshikha nunger densema liasü.
“Sargoshi” ya Kashmir aser idakji aliba nüburtem indang otsü meketa yangluba film ka lir. film nung Tom Alter, Imran Khan, Farida Jalal, Alok Nath, Inderneil Sengupta aser Aditi Bhatia nungeri shilem agir.