“Salman Khan tai mali süra, kübu shibai tepset asütsü?” : Firoz Shaikh

December 11, 2015: Küm 13 tejen ken o nung Salman Khan metentsüba sülen pa nüktzü aluba nisung aikati nguogo. Pa den külemi iba ken o nung obendang agütsüba TV nung kanga tenoka aser bendanga agüja repranger, Malvani slum colony nung alir, Firoz Shaikh-a temulung raksaa ajeb. Aji oda süaka pa nüktzü aluba tangoktsü asoshi pa anasa camera mesüra osangbenertem maliasü.

Shaikh ya Salman indang gari agi 2002 küm September ita nung menüngsetsang, Noorullah Khan’er jabaso lir.

Bombay High Court-i obendang agütsüba nung Shaikh-i bilemba tasüngdangba aika telangzüba mongutet. Küm 13 tashi ken o angadanga arur Shaikh-i tebu shibai tepsetar memeteti tembangogo.

Shaikh-ia Salman Khan-i shilem agiba film tem kanga sapua repranger. Salman metentsüba atema pai jashia mali, ajisüaka tebu shibai südaktsüar ibaji metetner.

“Ni Salman nem taitok agütsür, ajisüaka kübu shibai tepsetar ibaji metetner,” ta Shaikh-i ashi.

“Küm 13 süiaka kübu tepsetbaji shibar memetet aser kasa tasüngdangba teti kü dak alitsü,” pai shisem.

Shaikh ya tang arishi küm 25 tain lir aser 2002 küm tebu asüba sülen par kibong mesütsü mechi pa kaketrejudaki mao anen.

2002 küm nisung ka menüngsetba aser pezü yirutsüba tatalokba dak sentakba ken o nung Bombay High Court-i Brihostibarnü Salman Khan metentsüa liasü.