Salman’er Dhan Payo film-i Box Office nung otsü tasen yanglur

Mumbai, November 13 (Agencies): Actor Salman Khan-i tongti shilem agiba film, ‘Prem Ratan Dhan Payo’ film sayudak timba nung sayuba den külemi, iba film ajanga yaküm Diwali benjungmong mapang sayaba ‘Happy New Year’ film den sen timba tan Brehostibar nü aazükogo.

Alima ajunga nung film sayudak 5600 dak tema nung Salman-i tongti shilem agiba ‘Prem Ratan Dhan Payo’ film sayuba osang jangjaogo ta shishilembar Taran Adarsh-i metetdaktsü.

“Prem Ratan film ya sen aika indoka yanglu aser iba yongji, tan film yanglubaren nung takoksa angutsü akok ta tsübua bilem,” ta film director, Sooraj Bajatya-i tawa metetdakja liasü.

Ajisüaka, Salman den külemi, Sonam Kapoor-i tongti shilem agiba Prem Ratan film alima dang mezüngsüa sayunü sen timba aazüka tan otsü tasen yangluogo.

Box Office India-i ashiba agi, Prem Ratan film-i anogo ka nung sen crore 40 shi aazükba osang jangjaogo.

Prem Ratan film-i yaküm Diwali mapang sayuba Shah Rukh Khan’er Happy New Year film den sen timba aazükba den külemi, film mezüngsüa sayunü sen crore 38.50 shi aazükba ajanga ‘Bajrangi Bhaijaan’ aser ‘PK’ film na den sen timba aazüka Bollywood otsü tasen yanglur lir.

Bajrangi Bhaijaan film nung tongti shilem agiba densema, arishi küm 49 tain Salman-i jakrep ama shilem agiba Prem Ratan Dhan Payo film ya taküm 2015 küm tenzüker tanü tashi nung film tanabuba nung tongti shilem agir lir.