Salt Christian College küm 25 jungogo

Dimapur, November 25 (TYO) : Hokolbarnü Salt Christian College (SCC) Dimapur küm 25 ajungba jubilee ayongzüka amung.
Iba sentong ya “Forward for Excellence” omen nung ajemdaker College chapel hall nung agi aser jubileemung nung o jembitsü jaokerji Singapore nungi Rev. Mervyn Tan liasü.
Rev. Tan-i o jembidang ashiba agi, jubilee ya talenba nungi salaba anogo ka lir aser tejakleni aotsü atema nüjiso anguba anogo ka lir, ta ashi.
“Nisung ka taküm nung tayongzükba aika ajurutsü saka nenok taküm nung Tsüngrem lira, tayongzükba kechia ajurudir ajuruaka akoktsü,” ta paisa kaketshirtem ayongzük.
Rev. Tan-isa kaketshirtem dang kechisarena ajak nung Tsüngrem teyari meshia inyaktsü atema ayongzük.
Sentong nung Director & founder SCC & SCCTE, Dr. M. Panger Longchar-i college indang otsü tatsü agi lemsatep aser Principal SCC, Dr. R. S. Maurya-i tesentepertem pela agizük.
Sentong nungsa SCC kaketshirtemi shilem balala agi aser Rev. Thebemo Yanthan-i jubilee nüngshilung meshiteta sarasademtsür sayatsü.