Samaba mapang ?

– S. Nuken Longkümer, K. Colony Kohima.

Joko shirnok samago tanaben meyipa mangutsü, majurutsü, mapang süia aoba shingai tanaben meyipa bener marutet medem, aruya aliba nükla aser mapang temjiang repranga yok nung tajungba asütsü, Tsüngremi alitekong yanglua yutsü, Anü Ita petinutem yanglua yutsü Amang Sangwa yanglua yutsü, item ajak asen tenük agi teti angur, saka asenoki meshisadanger! Taküm nung tangar dang tai atoktsüba ya temela masü! Tsükchir dang tai atoktsü ya mapa tila masü. Saka tesüngmangtsü rongnung tesüngmangtsü ka lir! alima nung o tatembangji tesüngmangtsü ya dang lir, tesüngmangtsü o ya nü mulungjang taroktiba nung yua lir. Nai dang taidok agütsütetra tesüngmangtsü asütsü.
U.S.A lima nung president menden anaben tashi abensang Mr.Ronald Regan-ibo pa dak injang agi akhasang asangur dang tai toktet. Aser yamai ashi ta angazüker, shibai kü dak aka, pai memeteti inyak, pa kü tembar. Pa nem tasüba tagütsü, jail-i teyok, par kibong dangi meyipa yokang ta ashiba angashidang America nüburtem süngmang!! Mr.Regan arishi talang liasü, Asangur shibai pa dak injang khaloktsü pai nüktzü yima tatok nangzük aser taküm melenshi! Iba otzü ya tesüngmangtsü tulu liasü! Tesüngmangtsü inyaker rongnung asenok adentsü mulungra tesüngmangtsü temoatsü lir. Azü tokshiba teraji ali telungi alur aser tanaben temai jateta adoker iba mapa ajanga alima ajunga nung temeim mokongmokonga kümdaktsür. Tanü tenükmerem, arishitepa, tesempatep ajakji Tsüngrem O ajanga temeim agi dang koktettsü! Temeim mokonga akümba teraji sensaksem maliba ajanga akümer asütsü akok! Tashi temetet yanglutetba oset kodang amshitsü tenzük alimaji temeim temokongba küma ao! Ano aotsü?? Saka tatembang mapang ka lir! tanü alima ya kechi küma aor?? Alimaji kodanga tajungba makümtsü?? Sobaliba, chiaajemba, inyakba, jembiba, tashitemetet ojen dang oyaa atatsü, tatembangji Tsüngremer kabu nung tembangtsü, nü tepelemba ajak bener ponglang maliba leper nung tembangtsü anogo ajurutsü!! Tsüngrem tsübuang alima nung jangratemtsü kecha mali. Temeim ali asübo tenükmerem madoki I World War majurula! II World War madoktsü liasü! Rara tulu ana mapang nung taküm jenti sama!! Koda tapayutsü taküm asenoki Kohima leper angudang temulung raksaba ama, Alima nung iba mesük teraksa jenti angutsü, alima rangben otzü ya khen toktsür asen lima Nagaland telongtet nung kechi teraksa lir! Shisadangang asen Aor lenir masütsüsa koba mapa nungsa lir! Oh, Israel nunger nenok tekolak masü, tetsünglang kümdaktsütsü tanü Aor o Aor na arishitepdang tangarbo menüdong akümer. Aseni anitetba nüburtemi asen kin mezüngmeshitsü akümbaji reprangang!! Ao lima nungi adokba MLA parnok 10 putepa mali, Ao lima rongjener. Tanaben yanglushidi süra shiba metsüjang akümtsü! Lenir tajung aika lir ola mali!!
Dr.S.C.Jamir ya Ao kin nungi masü no! yamaji Aor ta asüdang Aortem koda tsüra-atemer! Tanü Aortem bendang lima sünga lir, samaro mali! Aor samaro kong lir! samaro nisung ka nüngdaker, takar temeteter jenti lir kechiba nür ki telung nung ajemajema kazür! Nibo peria lir, aji teperi masütsü! Tanü putu nung Israel nungertemji alima kin aikati tsübua bilemer, parnoki mim o tangar nem magütsür! Asüng lanurtem nungi samaro adoktsüsa tanü inyaka tokjang tetsübo agi mapa ajak amajok tekümdaktsü, samaro Lukesasong ama, A.Z.Phizo ama adokjangma.