Samagra Shiksha-i State Level Kala Utsav ayongzüka agi

State Level Kala Utsav sentong nung Mokokchung nungi kaketshirtemi sobaliba tsüngsang ka ajanga shilem agiba noksa nung angur.

Kohima, Mongputeni/October 29 (TYO): Samagra Shiksha, Nagaland-i ayongzüka Nagaland State level Kala Utsav sentong ka Neilhouzhü Kire GHSS, Seikhazou, Kohima nung tanü agiogo. Iba sentong nung Director of Information and Publicity Department, Limawati Ao tetushi tesemdanger liasü.
Sentong nung district ajak nungi kaketshir aser tesayurtem den jembiba mapang, Limawati-i ashiba agi, tsüngsang aser temang arakzüa inyaksangshiba maparetem ya school nung maths, science aser oshi nunger den jenjang kasa agütsütsüla. Tsüngsang ajanga tepela bener arutsür aser timtem mapang tesunep agütsüba den school nung mepetmesü adoka aliba süngjemdaktsür, ta pai ashi.
Paisa, bushitsüngdang ajanga ashiba agi, music ajanga tekelok renlokba nung teyari agütsür aser ken tang angaba kaketshirtem dang nungi musical instrument amshir kaketshirtem neural processing tajungba ta ngutetogo, ta ashi.
“Dreamz Unlimited” pur athishia pai ashiba agi, par telok nung züngsemtem ayong ayonga aayanga lidar aser Nagaland nung lanur ajak rongnung parnok nüngtuguba lir. Paisa, YouTube nung parnok indang video kabo nisung million ka dak temai reprangogo, koba asen tendak nungbo tajangtetba tulu ka lir, ta ashi.
Maneni pai, painting ajanga nisung ka süngjemshir alima penzütsü asoshi maongka agütsür aser ano nisung ka tebilemba lemsateptsü asoshi teyari agütsür, ta ashi.
Iba dak ajemdaker pai state education system nung stakeholder tem dang item inyakyimtem ajungkettsü aser renloka aotsü atema teyari agütsütsü mepeshi.
Sentong nungsa State Programme Coordinator Kala Utsav, Timothy Thong-i Kala Utsav sentong indang rasaa ashidang, Ministry of Human Resource Development (MHRD)-i secondary jenjang nung kaketshirtem aesthetics aser artistic experiences tem jangjatsü ya tongtibang ta angateter, kechiyong iba ajanga India sobaliba koda takar, iba indang tali tejangjaba metetdaktsür, ta ashi.
Education of Arts (Music, Dance, Visual Arts and Crafts) dak sendakba nung iba inyakyim ya National Curriculum Framework 2005-i benokba tetuyuba kübok inyaksangshir, ta pai metetdaktsü.
Thong-isa, Kala Utsav ya linük nung school kaketshirtem semtep sayaba den arangshija, secondary level nung education nung art ajungkettsü atema MHRD-i achaayanga inyaker, ta ashi.
Maneni, Kala Utsav sentong ajanga kaketshirtem nem living art traditions (Music, Theatre, Dance, Visual Arts and Crafts) maneni bushiloka aotsü, angatettsü aser sayutsü asoshi teyari agütsütsü, ta pai ashi.
Kala Utsav ajanga kaketshirtem nem school, district, state aser national jenjang nung sobaliba balala indang angazüktsü asoshi maongka agütsütsü. Kala Utsav ajanga kaketshirtem nem tangazükba agütsüba dang masü saka India nung sobaliba balala indang tanga stakeholder tem nem tangazükba agütsütsü. Maneni iba ajanga artists, artisans aser institution tem den school tesendaktep ajungkettsü, ta Timothy-i ashi.
Assistant Mission Director, SS Nagaland, Liyalo Apon lenisüba kübok iba sentong agi aser Assistant Mission Director, Samagra Siksha Nagaland, Chungngam Konyak-i tepela anküp o jembia liasü.
State Level Kala Utsav 2019 takokertem yamai alitsü:
Tetsür : Music (Vocal): 1st – Kuvelü Sakhamo, GHS Pholami, Phek aser 2nd – Zululemla, GHSS Tuli, Mokokchung
Music (Instrumental): 1st – Leyanla, GHSS Pungro, Kiphire aser 2nd – Izielie Disuang, GHSS Peren
Dance: 1st – Nitoli Aye GHS Zuheshe, Dimapur district aser 2nd – Povitra Rai, GHS Zhadima, Kohima district
Painting: 1st – Sentikumla Jamir, GHSS Tuli, Mokokchung aser 2nd – Nzanti R. Kithan, GHS Englan, Wokha
Tebur: Music (Vocal): 1st – Alemmeren, RCCJM, GHS Chantongya, Mokokchung aser 2nd – Wangtin, GHSS Tizit, Mon
Music (Instrumental): 1st – Puso Swuro, TMGHSS Kohima aser 2nd – Yantsuba, GHSS Pungro, Kiphire
Dance: 1st – Pode Kezo, GHS Pholami, Phek district aser 2nd – Anyangba RCCJ Memorial GHS Changtongya, Mokokchung district
Painting: 1st – Kashito Jakhalu, GHSS Zunheboto aser 2nd – Osepyanger, GHSS Tuli, Mokokchung.