Samar aliba Thai nunger tebur chanutem ngutetogo

Bangkok, Chiteni 03 (Agencies) : Thai nunger junior football team shirnok hopta ka tema tejaklen lungpok ka nungi madokteti bushitepa liasü, parnokji British nunger tzüwartemi taküm tajung nung lia ngutetogo saka parnok lungpok temai anir adoktsüji ano ita ishikabo agitsü, ta osang ka ajanga metetdaktsüogo.
Tebur chanu 12 den par football coach-ji yasüng Tentonü/Monday aonung tesü kongrasüker süaka taküm mesamai lia ngutetogo.
Arishi küm 11 nungi 16 tsüngda tebur chanutem aser arishi küm 25 tain par coach-ji anogo 9 sülen lungpok nungji ngutet.
Tanü Tentonü/Monday parnok atema chiyungtsü aser mozümora peria tonga bener lutsüogo saka parnok lungpok telung nung jagi mapang tatsükabo madoktettsü.
“Tajemba agi ita pezü atemabo parnok atema chiyungtsü renemtsütsüla aser par ter asemprong dang tzü awatsü sayutsü nüngdaker kechiaser lungpok nungi adokdang parnoki tzü wadanga aotsüsa akümtsü,” ta Navy Captain, Anand Surawan-i ashiba olen ka Thailand Armed Forces ajanga metetdaktsüogo.
Tham Luang ta ajaba lungpok talang nung samar alirtem bushitsü atema taoba hopta nung British nunger tzüwar pezü densema aru aser samar alirtemji British Cave Rescue Council nungi Rick Stanton aser John Volanthen nati mezüngbuba angu.
“Onoki lungpok nung aliba tzü ajunga atsüdoktsü merangtsü ajiser par ter asemprongji lungpok temai anir tugutsü. Tang parnok temang anepalutsü atema nurse ka aser doctor lungpok telung jagi yoktsü atema asameyangdagi,” ta osangbenertem den jembidang Chiang Rai province governor, Narongsak Osottanakorn-i metetdaktsü.
Iba osang angashia kinüngertem kanga pelatepdagi aser iba dak sendakba maparen nung Bangkok tonga “technical expertise” yoka yaritepdaktsüba asoshi India nung aliba Thai Ambassador, Chutintorn Gongsakdi-i Delhi dang pelaba metetdaktsüogo.